Ózbekstan Respublikası Suw xojalıǵı ministrligi hám Qaraqalpaqstan Respublikası Ministrler Keńesi tárepinen alıs aymaqlardıń suw támiynatın jaqsılaw boyınsha berilgen kórsetpelerdiń orınlanıwı boyınsha “MR-1” hám “MR-2” kanalların ılaydan tazalaw jumısları baslap jiberildi.

Tórtkúl rayonı hákimi I.Xudaybergenov aymaq turǵınları hám fermerler menen ushırasıp, rayon hákimligi hám Qaraqalpaqstan Respublikası Suw xojalıǵı ministrligi tárepinen “MR-1” hám “MR-2” kanalların ılaydan tazalaw jumısları baslanǵanın, Jambasqala, Paxta abat, Kókshe, Qumbasqan awıllarındaǵı jámi 10 mıń 200 gektardan aslam jerdiń suw támiynatı jaqsılanatuǵının atap ótti.
Gúzgi-qısqı ilajlar sheńberinde kanallardı tazalawǵa 307 mln. sum aqshalay qarjı ajıratıldı. Házirgi waqıtta suw xojalıǵı ministrligi tárepinen 4 hám rayonnan 2 ekskavator tartılıp, kanallar ılaydan tazalanbaqta.

Qaraqalpaqstan xabar agentligi