Ájiniyaz atındaǵı Nókis mámleketlik pedagogikalıq institutında jaslar arasında doslıq, óz ara húrmet hám mádeniy kóp túrlilikti ele de bekkemlew, studentler arasında awızbirshilik hám keńpeyillikti úgit-násiyatlaw maqsetinde, sonday-aq, 16-noyabr – Xalıqaralıq keńpeyillik kúni múnásibeti menen «Ózbekstan – ulıwma úyimiz!» súreni tiykarında «Biz – bir shańaraq perzentlerimiz» atamasındaǵı milletler aralıq tatıwlıq hám doslıq festivalı shólkemlestirildi.

Ilajǵa Ózbekstan Respublikasına miyneti sińgen jaslar ustazı Begdulla Sultanov, respublikamızda jumıs alıp barıp atırǵan milliy-mádeniy oraylardıń wákilleri, paytaxtımızdaǵı Muhammed ál-Beruniy atındaǵı orta arnawlı islam oqıw ornı oqıtıwshıları hám tıńlawshıları, institut professor-oqıtıwshılar, tyutorlar hám student-jaslar qatnastı.
Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov, milliy ideya, ruwxıylıq tiykarları hám huqıq tálimi kafedrasınıń professorı Tájixal Qudaybergenovalar shıǵıp sóylep, házirgi globallasıw dáwirinde milletler aralıq tatıwlıq, óz ara awızbirshilik, doslıq qatnasıqları jámiyetimiz hám mámleketimizdiń hár tárepleme rawajlanıwında úlken áhmiyetke iye baǵdarlardıń biri ekenligin atap ótti.
Instituttıń Pedagogika-psixologiya hám dóretiwshilik tálim fakulteti tárepinen shólkemlestirilgen festival sheber qollı, ónerment hám sportshı jaslardıń kórgizbesi menen baslanǵan bolsa, «Tumaris» xalıq ansambli hám talantlı student-jaslar atqarıwındaǵı koncert baǵdarlaması bayram qatnasıwshılarına kóterińki keypiyat inám etti.
Bayram qatnasıwshıları hám jaslar birgelikte túrli millet wákilleriniń yoshlı qosıqlarına ayaq-oyınlarǵa túsip, festivaldıń joqarı dárejede ótiwine úleslerin qostı.
Institut baspasóz xızmetiniń maǵlıwmatına qaraǵanda, házirgi waqıtta Ájiniyaz atındaǵı Nókis mámleketlik pedagogikalıq institutında 14 mıńǵa shamalas student-jaslar bilim alıp atırǵan bolıp, oqıw dárgayında qaraqalpaq, ózbek, qazaq, túrkmen, rus, ukrain, koreys, qırǵız, tájik, ázerbayjan, bashqurt, uyǵır hám tatar sıyaqlı ulıwma 11 milletke tiyisli studentler bir shańaraqtıń perzentlerindey, awızbirshilikte bilim almaqta.
Institutta usı baǵdardaǵı ilajlar turaqlı ótkeriliwi belgilengen.

Qaraqalpaqstan xabar agentligi.