Respublikamız paytaxtı Nókis qalasında «Jasıl mákan» ulıwma milliy joybarı sheńberinde gúzgi terek nállerin egiw jumıslarına start berildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, elimizdiń abadanlıǵın, qorshaǵan ortalıqtıń tazalıǵın támiyinlewimiz hám jasıl aymaqlardıń payda etiliwinde pútkil xalqımız benen birge at salısıwımız kerek ekenligin atap ótti.
Ilajda Ministrler Keńesiniń Baslıǵı F.Ermanov, mákeme-shólkem basshıları, belsendi jaslar, nuranıylar, keń jámiyetshilik wákilleri qatnastı.
Atap ótilgenindey, sońǵı jılları húrmetli Prezidentimiz tárepinen mámleketimizde jasıl aymaqlardı keńeytiw hám sol arqalı ekologiyalıq jaǵdaydı jaqsılawǵa ayrıqsha itibar qaratılmaqta. Ámelge asırılıp atırǵan “Jasıl mákan” ulıwma milliy joybarı sheńberinde qala hám rayonlarda hár túrli sayamanlı hám miyweli terek nálleri egiliwi dawam ettirilip atır.
Sonıń ishinde, bıyılǵı gúzgi nál egiw máwsiminde 8 mln. 781 mıń túp sayamanlı hám miyweli terek nállerin egiw, Nókis qalası hám rayon oraylarındaǵı 19 gektar maydanda «Jasıl jámiyetlik park»ler jaratıw rejelestirilgen. Bul ilajlardı joqarı dárejede shólkemlestiriw maqsetinde nálxanalardı 10 mln. túpten aslam sayamanlı hám miyweli terek nálleri jetistirilmekte.
Ótkerilgen bul áhmiyetli ilajda egiske tayarlanǵan jer maydanlarına jaqsı niyetler menen terek nálleri tigildi.

Qaraqalpaqstan xabar agentligi