Múnásibet

Salamatlıq insan ómirindegi eń áhmiyetli hám qádirli baylıq. Salamatlıǵımızdı qásterlep saqlaw, bárinen burın, ózimizge baylanıslı. Sonıń menen birge, densawlıǵımızda júzege keletuǵın nuqsanlardı saplastırıwda salamatlıq saqshıları bolǵan medicina xızmetkerleriniń ornı hám xızmeti sheksiz. Sonıń ushın da elimizde usı taraw wákillerin qollap-quwatlawǵa ayrıqsha itibar qaratıladı.
Mámleketimiz basshısı 10-noyabr kúni Tashkent mámleketlik medicina universitetine barıp, mámleketimiz densawlıqtı saqlaw sistemasın sanlastırıw, medicina mákemelerinde xızmetlerdiń sapasın arttırıw hám medicinalıq bilimlendiriwdi jetilistiriw boyınsha ámelge asırılıp atırǵan jumıslardıń prezentaciyası menen tanıstı. Sonday-aq, medicina hám farmacevtika xızmetkerleri menen ushırasıw ótkerip, jıynalǵanlardı Medicina xızmetkerleri kúni menen qızǵın qutlıqladı.
Buǵan Oliy Majlis Nızamshılıq palatasınıń deputatı Azamat Pardaev óz múnásibetin bildirdi:
— Ózbekstan Respublikası Prezidenti Shavkat Mirziyoev Tashkent mámleketlik medicina universitetine saparı waqtında mámleketimiz densawlıqtı saqlaw sistemasın sanlastırıw, medicina mákemelerinde xızmetlerdiń sapasın arttırıw hám medicinalıq bilimlendiriwdi jańa basqıshqa kóteriw boyınsha ámelge asırılıp atırǵan jumıslar menen tanıstı.
Sońǵı jılları medicina tarawına 230 trillion sumnan aslam qarjı qaratılıp, 187 jańa emlewxana hám poliklinika qurıldı, mıńnan aslam mákemeler rekonstrukciyalandı. Nátiyjede birlemshi medicinalıq xızmet xalıqqa jáne de jaqınlastı, burın tek ǵana paytaxtta orınlanǵan 400 den aslam joqarı texnologiyalıq ámeliyatlar endi aymaqlarda da ámelge asırılmaqta.
Prezidentimiz sapar dawamında atap ótkenindey, medicinadaǵı sanlı ózgerisler nawqaslar ushın qolaylılıq, shıpakerler ushın nátiyjelilik, mámleket ushın bolsa ashıq-aydınlıq hám únemlilikti támiyinleydi. Atap aytqanda, DMED birden-bir elektron sisteması, “Elektron recept”, “Onlayn-shıpaker” sıyaqlı sanlı sheshimler medicina sistemasına túpkilikli jańalıqlar alıp kirmekte.
Sonıń menen bir qatarda, Prezidentimiz tárepinen qabıl etilgen medicina hám farmacevtika xızmetkerlerin qollap-quwatlawǵa qaratılǵan qarar taraw xızmetkerleri ushın úlken sociallıq hám ruwxıy xoshamet boldı.
Usı qararǵa muwapıq, 2026-jıldan baslap hár bir medicina xızmetkeri Medicina xızmetkerleri kúni múnásibeti menen jıllıq xoshametlew pulın aladı. “Eń jaqsı medicina mákemesi” hám “Eń jaqsı shıpaker” tańlawları engizilip, jeńimpazlarǵa 30 million sumnan 500 million sumǵa shekemgi sıylıqlar beriledi. 15 jıldan artıq stajǵa iye xızmetkerlerdiń perzentleriniń kontrakt tólemleriniń bir bólegi qaplap beriledi. Turaq jay satıp alıwda dáslepki tólemniń 25 procenti mámleket tárepinen qarjılandırıladı. Sonday-aq, milliy akkreditaciyadan ótken mákeme xızmetkerlerine 10 procentlik aylıq ústeme tólenedi. Barlıq medicina xızmetkerlerine mámleketlik xızmetler ushın tólemler eki esege azaytıladı.
Medicina sistemasınıń sanlastırılıwı hám shıpakerlerdiń miynetin qádirlew salamat jámiyet qurıwdıń eń áhmiyetli girewi ekenin atap ótiw kerek. Solay eken, deputat sıpatında bul reformalardı turmısqa engiziwde belsene qatnasıw biziń de tiykarǵı wazıypamız bolıp esaplanadı.

Muhtarama Komilova jazıp aldı. ÓzA