Oraylıq Aziya regionı ushın suw máselesi tek ǵana ekologiyalıq emes, al ekonomikalıq-siyasiy áhmiyetke de iye. Paytaxtımızda “Oraylıq Aziyada suw mashqalaları” temasında regionallıq seminar bolıp ótti.

Ilaj “Blue Peace Central Asia” baslaması sheńberinde Xalıqaralıq suw resursların basqarıw institutı, Xalıqaralıq tábiyattı qorǵaw awqamı, Shveycariya rawajlanıw hám birge islesiw agentligi hám Ózbekstan Respublikası Suw xojalıǵı ministrligi menen birgelikte shólkemlestirildi.
Bul ushırasıw regionda suw hám klimat boyınsha uzaq múddetli mashqalalardı dodalaw hám birge islesiwdi bekkemlew ushın úlken maydan wazıypasın atqaradı.
Seminarǵa Qazaqstan, Qırǵızstan, Tájikstan, Túrkmenstan hám Ózbekstannan 60 tan aslam qánigeler, sonday-aq, BMSh, Jáhán banki, GIZ sıyaqlı xalıqaralıq shólkemlerdiń wákilleri qatnastı. Seminar dawamında strategiyalıq tallaw, beyimlesiw tiykarǵı baǵdarları, suw diplomatiyası, kishi transshegaralıq derekler hám mamanlıq kónlikpelerin arttırıw sheńberindegi birge islesiw dodalandı.
Bul seminar dawamında qatnasıwshılar 2025-2026-jıllar ushın rejelestirilgen birge islesiw baǵdarların belgilep aldı. Dodalawlarda klimat ózgeriwi tásiri, suw resurslarına artıp baratırǵan basım hám muzlıqlardıń qısqarıwı aqıbetinde payda bolıp atırǵan qáwip-qáterler hám imkaniyatlar hár tárepleme tallandı.
Topar dodalawları nátiyjesinde regionallıq beyimlesiw tiykarǵı baǵdarları, sonıń ishinde, qarjılandırıwdıń innovaciyalıq mexanizmleri, maǵlıwmat almasıwı, ilimiy-izertlew orayları hám universitetler arasındaǵı birge islesiwdi kúsheytiw zárúr ekenligi atap ótildi. Májiliste húkimetler, izertlewshiler hám puqaralıq jámiyeti arasındaǵı birge islesiwdi bunnan bılay da bekkemlew boyınsha usınıslar bildirildi.

ÓzA