Qazaqstan Respublikası mádeniyat hám málimleme ministri Aida Balaeva Ózbekstan menen birge islesiw búgingi kúnde bekkem doslıq hám jaqsı qońsıshılıqqa súyenip rawajlanıp atırǵanın atap ótti. Onıń aytıwınsha, tariyxıy tamırları birdey eki tuwısqan xalıqtı ulıwma mádeniyat, til hám qádiriyatlar ázelden birlestirip kelgen.

– Qazaqstan Prezidenti Qasım-Jomart Toqaev hám Ózbekstan Prezidenti Shavkat Mirziyoevtiń basshılıǵında alıp barılıp atırǵan siyasat mádeniy-gumanitarlıq baylanıslardı jańa basqıshqa kóterdi, – deydi xızmetker. – Strategiyalıq birge islesiw boyınsha kelisim, eki mámleket basshılarınıń qızǵın sóylesiwleri hám mádeniyat tarawındaǵı birgeliktegi baslamalar ózine tán jaqınlıqtıń ámeliy nátiyjesi bolıp esaplanadı. Keyingi jıllarda ótkerilip atırǵan “Qazaqstan mádeniyatı kúnleri” hám “Ózbekstan mádeniyatı kúnleri,” hár qıylı dóretiwshilik festivallar, kórgizbeler, teatr almasıwları óz-ara ruwxıy jaqınlıqtı jáne de kúsheytpekte. Jas dóretiwshiler ushın jaratılıp atırǵan ulıwmalıq baǵdarlamalar bolsa integraciyanı dawam ettiretuǵın jańa áwladtıń qáliplesiwine xızmet etpekte.
Aida Balaeva xalıq muzıkası, ádebiy miyras hám awızeki dóretiwshiliktegi uqsaslıq ta eki xalıqtıń qálbin bir-birine baylanıstırıp kiyatırǵanın atap ótti. Onıń pikirinshe, mádeniyat – tek ǵana dóretiwshilik birge islesiw maydanı emes, al keleshek áwladlar arasında doslıq hám isenimdi bekkemleytuǵın eń kúshli qural. Qazaqstan hám Ózbekstannıń mádeniy birge islesiwi Oraylıq Aziyada turaqlılıq hám rawajlanıw ushın da áhmiyetli. Ol regionallıq forumlar, jaslar baǵdarlamaları hám miyrastı saqlaw boyınsha birgeliktegi joybarlardı ulıwma tariyxıy juwapkershiliktiń kórinisi sıpatında bahaladı. Sheriklikti jáne de keńeytiw, kino, teatr, ádebiyat hám muzıka baǵdarlarında jańa platformalar jaratıw tárepdarı ekenin aytıp, mádeniyat arqalı qurılǵan doslıq – búgingi hám keleshek áwlad ushın biybaha miyrasqa aylanatuǵınına isenim bildirdi.

ÓzA