Aldın xabar berilgenindey, Ózbekstan Respublikası Prezidentiniń 2025-jıl 19-sentyabrdegi arnawlı pármanına muwapıq xalıqtı hám awıl xojalıǵın dizimge alıwǵa tayarlıq jumısları basqıshpa-basqısh ámelge asırılmaqta.

Usı múnásibet penen Qońırat rayonında máhálle jetiligi xızmetkerleriniń qatnasıwında ámeliy seminar ótkerildi.
Ilaj dawamında dizimge alıw basqıshları, sorawnamalar menen islesiw tártibi hám elektron sistema arqalı maǵlıwmat kirgiziw procesi boyınsha tolıq túsinikler berildi.
Qatnasıwshılarǵa respondentler menen pikirlesiw, sorawnamalardı toltırıwda itibarlı bolıwı kerek bolǵan tárepler hám xalıqqa durıs maǵlıwmat jetkeriw boyınsha ámeliy kórsetpeler berildi.
Bunday seminarlar orınlardaǵı juwapker xızmetkerlerdiń bilim hám tájriybesin arttırıw, dizimge alıw procesin puqta hám nátiyjeli shólkemlestiriwge xızmet etedi.

Qaraqalpaqstan xabar agentligi