Qaraqalpaqstan Respublikası Sanitariyalıq-epidemiologiyalıq tınıshlıq hám jámiyet salamatlıǵı basqarması tárepinen Nókis diyqan bazarında azıq-awqat qáwipsizligine ámel etiliwi ústinen jámiyetlik qadaǵalawı ótkerildi.

Jámiyetlik orınlarda azıq-awqatlardıń satılıwı bar gáp, biraq sol azıq-awqat ónimleri sanitariyalıq jaqtan qanshelli sapalı, kepillengen?
– Úy sharayatında azıq-awqat ónimlerin tayarlap, bazarlardaǵı belgilenbegen orınlarda satıp otırǵan puqaralarımıǵa túsinik jumısları alıp barıldı. Olar satıp atırǵan konserva bankalardaǵı ónimler, pirajki, somsa, sút ónimleri hám basqalar tekserilip kórilgeninde kópshiliginiń sanitariyalıq talaplarǵa juwap bermeytuǵınlıǵı, satıp otırǵan jerleriniń de talapqa juwap bermeytuǵınlıǵı anıqlandı, – deydi basqarmanıń bólim meńgeriwshisi Biybigúl Uzaqbaeva.
Puqaralarımızǵa azıq-awqat ónimlerin gúmanlı bolǵan jerlerden satıp almawdı, satıp alıp atırǵan ónimniń sapası, tazalıǵı, kórinisi, ıdısınıń pútinligi, gigienalıq individual ıdıslarda beriliwine itibar beriwin usınıs etemiz. Sonday-aq, ónimlerdiń saqlanıw jaǵdayı (ayırım jaǵdaylarda temperatura talaplarına juwap bermeydi), awqattı tayarlaǵanda paydalanılǵan ónimler haqqında maǵlıwmatlardı sorastırıwıńızdı, jaramlılıq múddetlerine qarawdı da umıtpaw kerek.
Sanitariyalıq-epidemiologiyalıq tınıshlıq hám jámiyet salamatlıǵı xızmetkerleri tárepinen orınlarda reyd ilajları dawam etpekte.

Á.Jiyemuratov,
Qaraqalpaqstan xabar agentligi