Jizzaq wálatında sporttıń Velosport-bmx jónelisi boyınsha er balalar hám qızlar arasında Ózbekstan kubogi jarısı bolıp ótti.

Jarısqa elimizdiń barlıq aymaqlarınan kúshli velosportshılar qatnastı. Usı sportshılar arasında respublikamız saylandı komandası da tabıslı qatnasıp, bir neshe medallardı qolǵa kirgizdi. Atap aytqanda, jekkelik bellesiwdiń klassik túri boyınsha Gúlbáhár Xojanazarova 1-orındı iyelegen bolsa, Alina Urazbaeva hám Zakima Tolıbaevalar ekinshi, Nurgúl Ǵanibaeva úshinshi orındı iyelewge miyasar boldı.
Al, komandalıq bellesiwlerde bolsa, Gúlbáhár Xojanazarova, Alina Urazbaeva, Zarina Biysenbaeva, Zakima Tolıbaeva, Aysulıw Qudaybergenova hám Nurgúl Ǵanibaevalar ózleriniń shaqqanlıǵı hám sheberligin kórsetip, altın medal iyesine aylandı. Sportshılarımızdı jarısqa tájiriybeli trenerlerden P.Arıslanbaev hám B.Qudaybergenovlar tayarladı.

Adilbay Orazov,
Qaraqalpaqstan xabar agentligi sholıwshısı.