Bozataw rayonında mini futbol boyınsha 2009-2011-jıllar aralıǵında tuwılǵan jas óspirimler arasında «Prokuror kubogi» bolıp ótti.

Jarıstıń ashılıw máresimine rayon prokurorı Nuralı Saparov hám tiyisli taraw wákilleri qatnasıp, rayonda sońǵı jılları jaslar arasında salamat turmıs tárizin en jaydırıw hám olardıń fizikalıq belsendiligin arttırıw boyınsha ámelge asırılıp atırǵan jumıslarǵa toqtap ótti hám jaslardı usınday jarıslarǵa belsene qatnasıwǵa shaqırdı.
Bunnan soń rayon aymaǵındaǵı máhállelerden kelgen komandalar jeńimpazlıq ushın óz-ara bellesti.
Bellesiwler sońında, birinshi orındı Erkindárya awıl puqaralar jıyınında jaylasqan 7-sanlı ulıwma orta bilim beriw mektebi komandası jeńip alıp, kubok iyesine aylandı.
Finalǵa shekem tabıslı jetip kelgen qusxanatawlı jaslar ekinshi, Bozataw posyolkalıq puqaralar jıyını komandası úshinshi orınlardı iyelewge miyasar boldı.
Jarıs juwmaǵında, jeńimpazlar shólkemlestiriwshiler tárepinen tayarlanǵan diplom hám estelik sawǵaları menen sıylıqlandı.

B.Toxpanov,
Berdaq atındaǵı QMU jurnalistika tálim baǵdarınıń studenti.
Qaraqalpaqstan xabar agentligi