Keyingi jılları dúnya kóleminde klimat ózgeriwi hám qorshaǵan ortalıq mashqalaları barǵan sayın úlken áhmiyetke iye bolmaqta. Turaqlı rawajlanıwǵa erisiwde uglerod shıǵındıların qısqartıw hám “jasıl” ekonomikaǵa ótiw áhmiyetli wazıypalardan birine aylandı.

Ózbekstan da bul processke belsene qatnasıp, uglerod-neytral ekonomikaǵa basqıshpa-basqısh ótiw boyınsha bir qatar reformalardı ámelge asırmaqta. Sonıń menen birge, gender teńligi principlerin usı tarawdaǵı siyasat hám joybarlarǵa integraciyalaw máselesine de úlken itibar qaratılmaqta.
Energetika ministrliginde “Ózbekstanda uglerod-neytral ekonomikaǵa ótiw boyınsha genderge baǵdarlanǵan hám ádil “Jol kartası”n islep shıǵıw” joybarı sheńberinde ótkerilgen texnikalıq dógerek sáwbetinde usı haqqında sóz boldı.
Ilajda usı joybarǵa tiykarlanıp mámleketimizdiń uglerod-neytral ekonomikaǵa basqıshpa-basqısh ótiw procesinde gender máseleleri esapqa alınatuǵını hám “Jol kartası” islep shıǵılatuǵını atap ótildi.
Qánigelerdiń málim etiwinshe, bul baslama Ózbekstan energetika, neft-gaz hám geologiya xızmetkerleri kásiplik awqamı Respublikalıq keńesi, Energetika ministrligi, Evropa tikleniw hám rawajlanıw banki hám BMSh Hayal-qızlar strukturası menen birgelikte ámelge asırılmaqta.
Dógerek sáwbetinde dáslepki tallaw nátiyjeleri hám “Jol kartası”n islep shıǵıw procesi tanıstırıldı. Qatnasıwshılar hújjetke kirgiziliwi múmkin bolǵan ámeliy qurallar, sonday-aq, gender teńligi hám inklyuziv klimat siyasatın rawajlandırıw mexanizmlerin dodaladı.
“Aymaqlıq elektr tarmaqları” akcionerlik jámiyetiniń wákili Saodat Ibragimova óziniń shıǵıp sóylegen sózinde jámiyet jumısında gender teńligi máselelerine ayrıqsha itibar qaratılıp atırǵanın atap ótti.
– Sistemada hayal-qızlar ushın múnásip miynet sharayatın jaratıw, olardıń basshılıq lawazımlarında belsene qatnasıwın qollap-quwatlaw, sonday-aq, kásiplik mamanlıǵın arttırıw boyınsha sistemalı jumıslar ámelge asırılmaqta. Energetika tarawında hayal-qızlardıń jumısın keńeytiw tek ǵana sociallıq ádillik kózqarasınan emes, al jumıs nátiyjeliligin arttırıwda da úlken áhmiyetke iye. Jámáátimizde hayal-qızlar tek ǵana injenerlik yamasa buxgalteriya baǵdarlarında emes, al joybar basqarıwı hám strategiyalıq qarar qabıl etiw processlerinde de belsene qatnaspaqta. Genderge baǵdarlanǵan qatnasıqlar turaqlı rawajlanıw maqsetlerine erisiwde áhmiyetli faktor bolıp, bul baǵdarda tájiriybe almasıw hár tárepleme paydalı, – dedi S.Ibragimova.
Májilis juwmaqları boyınsha mápdar tárepler birge islesiwdi kúsheytiw wazıypaların belgilep aldı.

Nasiba Ziyodullaeva, ÓzA