Taw-kán sanaatı hám geologiya tarawın qadaǵalaw inspekciyası tárepinen 2025-jılı jer astınan nızamsız paydalanıw, jer astı suwların qadaǵalaw baǵdarlarında bir qatar qadaǵalaw ilajları ámelge asırılǵan.

Onda fizikalıq hám yuridikalıq táreplerge jazba kórsetpeler berilgen. Ayırım kárxanalardıń jumısı toqtatıp qoyılǵan. Huqıqbuzarlıq islegen bir qatar subektler bolsa hákimshilik juwapkershilikke tartılǵan.
Bul haqqında Oliy Majlis Nızamshılıq palatası Isbilermenlik, básekini rawajlandırıw hám sanaat máseleleri komitetiniń májilisinde aytıp ótildi. Onda Taw-kán sanaatı hám geologiya tarawın qadaǵalaw inspekciyasınıń usı jılı ámelge asırǵan jumısları boyınsha málimlemesi tıńlandı.
Málimlemede keltirilgenindey, usı jılı jer astınan paydalanıwda videojazıw arqalı dizimge alınǵan huqıqbuzarlıqlardı kórip shıǵıw, jer astınan paydalanıw tarawında huqıqbuzarlıqlar dizimge alınǵan videojazıwlardı jibergen shaxslardı xoshametlew tártibin belgileytuǵın reje tastıyıqlandı. Bul bolsa tarawda jámiyetlik qadaǵalawdı kúsheytip, huqıqbuzarlıqlardı azaytıwǵa xızmet etpekte.
Tarawdı sanlastırıw baǵdarında “Geomonitoring” málimleme sisteması islep shıǵılıp, jasırın ekonomikanıń aldın alıw ushın málimleme sistemasında ruda emes paydalı qazılmalar boyınsha maǵlıwmatlar bazası sanlastırıldı. Málimleme sisteması bir qansha tiyisli mámleketlik uyımlardıń sistemaları menen integraciya etildi.
Dodalawlarda deputatlar nızamsız qazıp alıw jaǵdayları elege shekem joqarı ekeni, bul baǵdarda qadaǵalaw ilajların kúsheytiw zárúrligi, sanlastırıwdı jedellestiriw arqalı insan faktorın azaytıw, korrupciyanıń aldın alıw, taw-kán sanaatı kárxanalarında júz bergen baxıtsız hádiyselerdiń sebeplerin tallap, olardıń aldın alıw zárúr ekenligin atap ótti. Bul baǵdarda bir qatar pikir-usınıslar berildi.

Muhtarama Komilova, ÓzA