Kickstarter platformasında Prolo Ring atlı zamanagóy hám minimalistlik dizayndaǵı aqıllı júzik usınıldı. Ol kompyuter tıshqanınıń ornın basıwǵa uqıplı bolıp, kampaniya baslanǵanınan tek ǵana 9 minut ótip kerekli qarjını jıynadı.

Prolo Ring 5 gramm awırlıqta bolıp, kórsetkish barmaqqa taǵıladı. Qurılmada sensorlı panel, 6 kósherli háreket datchigi hám tiygiziw sensori bar. Kursordı basqarıw, betti aylandırıw, masshtabtı ózgertiw yamasa túrli buyrıqlardı orınlaw bas barmaq háreketi menen ámelge asırıladi. Júzik 40 tan artıq belgilerdi tanıydı hám paydalanıwshı olardı óz qálewine qarap sazlawı múmkin.
Jouy CHengtiń sózlerine bola, Prolo Ringten paydalanıwdı úyreniw ushın tek ǵana 5 minut jetkilikli. “Bul tek ǵana ısırıw hám basıwlardan ibarat. Sazlaw procesi bolsa dóretiwshilik hám qızıqlı,” – deydi ol.
Prolo Ring oyın oynaw, internette islew hám kúndelikli kompyuter wazıypaların orınlawda tıshqandı tolıq almastıra aladı. Biraq 3D-modellestiriw yamasa fotosúwret redaktorlaw sıyaqlı joqarı anıqlıq talap etetuǵın jumıslar ushın ol onsha sáykes emes – kishi kólem anıqlıqtı shekleydi.
Qurılma Bluetooth arqalı qálegen sistemaǵa jalǵanadı, bir saatta tolıq quwatlanadı. Biraq batareya segiz saatlıq jumıs kúnin tolıq óte almaydı. Sol sebepli toplamǵa zaryadlawshı qutı da kirgizilgen bolıp, ol júzikti 30 kúnge shekem quwatlap tura aladı.
Prolo Ring házirgi waqıtta 99 dollarǵa aldınnan buyırtpa beriw múmkin, aqırǵı usaqlap satıw bahası bolsa 199 dollar bolıwı kútilmekte. Dáslepki jetkerip beriw 2025-jıldıń dekabrine rejelestirilgen.

Madinabonu Nasrieva, Anvarxwja Ahmedov, ÓzA