Mámleketimiz basshısınıń mámleketlik emes kommerciyalıq emes shólkemlerge, ásirese, Bas nızamımızda jámiyetlik birlespeler sıpatında atap ótilgen kásiplik awqamlarına bolǵan ayrıqsha itibarı nátiyjesinde mámleketimizde Ózbekstan kásiplik awqamları háreketiniń 120 jıllıq yubileyi hám “11-noyabr – Ózbekstan kásiplik awqamları kúni” bayram sıpatında keń belgilenip kelinbekte.

Nókis qalasındaǵı payızlı orınlardıń birinde 11-noyabr – Kásiplik awqamları kúni múnásibeti menen Ózbekstan mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komiteti tárepinen bayram ilajı shólkemlestirildi.
Oǵan tiyisli ministrlikler menen shólkemlerdiń basshıları, nuranıylar, qala hám rayonlardaǵı mádeniyat, sport hám turizm tarawları hám de jaslar isleri agentlikleri xızmetkerleri kásiplik awqamları shólkemleriniń basshıları qatnastı.
Ilajda shıǵıp sóylegenler kásiplik awqamları tárepinen kárxana hám shólkemlerde jumıs islep atırǵan xızmetkerlerdi, ásirese, jaslardı qollap-quwatlaw, olar ushın jaratılǵan imkaniyatlar hám jeńillikler, jumıs islewshilerdiń máplerin qorǵaw boyınsha ámelge asırılıp atırǵan jumıslardı ayrıqsha atap ótti.
Atap ótilgenindey, bıyıl elimizde miynetkeshlerdiń haqıyqıy bayramı – kásiplik awqamları háreketiniń 120 jıllıǵı hám 11-noyabr – Ózbekstan kásiplik awqamları kúni joqarı quwanısh hám kóterińki ruwxta belgilenbekte.
Ilaj dawamında kásiplik awqamları belsendileri, nuranıylar hám jaslar birlesken komitettiń Húrmet jarlıǵı hám estelik sawǵaları menen sıylıqlandı.
Bayram ilajında qatnasıwshılar dasturxan átirapında óz-ara sáwbetlesip, pikir alısıp, tájiriybe almasıw múmkinshiligine iye boldı.
Ilaj kórkem óner sheberleriniń atqarıwındaǵı koncert baǵdarlaması menen dawam etti.

Á.Jiyemuratov,
Qaraqalpaqstan xabar agentligi.