Nókis qalasında futbol boyınsha eresekler arasında «Kubok iyeleri kubogi» respublikalıq turniri bolıp ótti.

Tórt kún dawam etken bul turnirge mámleketimizdiń kóplegen aymaqlarınan 9 komanda qatnastı. Bul abıraylı jarısta respublikamız atınan Qaraqalpaqstan kuboginiń bıyılǵı jeńimpazı bolǵan Ishki isler ministrliginiń «MVD» komandası qatnasıp, topar basqıshı hám yarım final oyınların kóterińki ruwxta juwmaqladı.
Atap aytqanda, komandamız futbolshıları topar basqıshında Almalıqtıń «OKMK» hám Samarqandtıń «Kattaqorǵan» komandaların jeńip, yarım finalda «Ziyokor» klubın 3:1 esabında artta qaldırıwǵa eristi.
Al, turnirdiń finallıq bellesiwinde bolsa, Ferǵana wálayatınıń «Yaypan» klubın 4:3 esabında jeńip, kubok jeńimpazına aylandı.
Turnir sońında bir qatar nominaciyalar boyınsha eń jaqsılar anıqlanıp, onda «Yaypan» dárwazamanı Mirzohid Jalilov «Eń jaqsı dárwazaman», «MVD» futbolshıları Uluǵbek Qádirberdiev «Eń jaqsı qorǵawshı», Amir Abdraziev «Eń jaqsı top urar», «Yaypan» nıń jáne bir aǵzası Abduvosidxon Abdurashidov «Eń jaqsı futbolshı» dep tabıldı.
Jarıs sońında jeńimpaz komandalar shólkemlestiriwshiler tárepinen tayarlanǵan kubok hám estelik sawǵalar tapsırıldı.

Adilbay Orazov,
Qaraqalpaqstan xabar agentligi sholıwshısı