Moynaq rayonında Ózbekstan Respublikası Prezidentiniń Qaraqalpaqstan Respublikasın sociallıq-ekonomikalıq rawajlandırıw baǵdarında qabıl etilgen párman hám qararları tiykarında berilip atırǵan imkaniyatlar hám jeńilliklerdi xalıqqa jetkeriw boyınsha ushırasıw bolıp ótti.

Oǵan rayon hákimi, orınbasarları, rayon aymaǵındaǵı fermerler, awıl xojalıǵı tarawı wákilleri, máhálle jetiligi, mákeme hám shólkem basshıları qatnastı.
Ushırasıwda Prezidentimiz tárepinen qabıl etilgen Qaraqalpaqstan Respublikası ushın áhmiyetli qararlar haqqında maǵlıwmatlar berildi.
Atap aytqanda, Ózbekstan Respublikası Prezidentiniń 2025-jıl 3-noyabrdegi “Qaraqalpaqstan Respublikasında tikkeley sırt el investiciyaların tartıw esabınan Jaslar sociallıq-ekonomikalıq orayın qurıw ilajları haqqında”ǵı, “Qaraqalpaqstan Respublikasında duzdı qayta islewdi rawajlandırıwǵa qaratılǵan ilajlar haqqında”ǵı hám “Sharwashılıq ot-jem bazasın jaqsılaw hám awıl xojalıǵındaǵı bar resurslardan nátiyjeli paydalanıw ilajları haqqında”ǵı qararlarınıń mazmun-mánisi keń túrde túsindirildi.
Usı mazmundaǵı ushırasıw Shomanay rayonında da ótkerilip, onda rayon hákimi, rayonlıq Ishki isler bólimi baslıǵı, hákim orınbasarları, máhálle belsendileri, nuranıylar, jaslar jetekshileri, hayal-qızlar belsendileri, sonday-aq, rayon kólemindegi barlıq shólkem hám mákemelerdiń basshıları qatnastı. Májilis dawamında Qaraqalpaqstan Respublikasın sociallıq-ekonomikalıq rawajlandırıwǵa baylanıslı qabıl etilgen qararlardıń mazmun-mánisi tolıq túsindirilip, jaratılǵan imkaniyatlar hám jeńillikler haqqında maǵlıwmatlar berildi.
Sonday-aq, qararlardıń orınlanıwın nátiyjeli támiyinlew, olardı turmısqa engiziw procesinde máhálleler, jámiyetshilik hám tiyisli shólkemler arasında óz-ara birge islesiwdi kúsheytiw boyınsha pikir-usınıslar bildirildi.
Qanlıkól rayonında máhálle jetiligi aǵzaları, máhállelerdegi belsendi nuranıylar, kóshe basshıları, hayal-qızlar hám belsendi jaslar, fermer xojalıǵı basshıları hám rayondaǵı barlıq shólkem hám mákeme basshılarınıń qatnasıwında ótkerilgen usınday ushırasıwda da Prezident qararlarınıń mazmun-mánisi xalıqqa jetkerilip, jaratılıp atırǵan imkaniyatlardan nátiyjeli paydalanıw máseleleri dodalandı.
Májiliste rayon hákimi hám basqalar Qaraqalpaqstan Respublikası xalqı ushın berilip atırǵan imkaniyatlar bárinen burın Ózbekstan Respublikası Prezidentiniń turaqlı itibarı hám ámeliy baslamalarınıń nátiyjesi ekenin atap ótti.
Ilaj juwmaǵında qararlarda belgilengen wazıypalardı orınlarda nátiyjeli ámelge asırıw boyınsha ilajlar belgilendi.
Orınlarda usı mazmundaǵı ushırasıwlar dawam etpekte.

Qaraqalpaqstan xabar agentligi