Tashkent qalasında Mektepke shekemgi bilimlendiriw shólkemleri tárbiyalanıwshıları arasında «Jajji nurli yulduzlar» festivalınıń respublikalıq basqıshı bolıp ótti.

Festivalǵa mámleketimizdiń barlıq orınlarınan tańlawdıń aymaqlıq basqıshlarında jeńimpaz bolǵan kórkem ónerge qızıǵıwshı 5-7-jas aralıǵındaǵı baqsha tárbiyalanıwshıları qatnasıp, bir neshe nominaciyalar boyınsha óz-ara jarıstı.
Qızıqlı ótken festival juwmaǵında, «Kishkene atqarıwshı» nominaciyasında Nókis qalasındaǵı 55-sanlı mektepke shekemgi bilimlendiriw shólkemi tárbiyalanıwshısı Qoblan Burkitov, «Ájayıp namalar» nominaciyasında Qońırat rayonındaǵı 8-sanlı mektepke shekemgi bilimlendiriw shólkemi tárbiyalanıwshısı Jasmina Oraqbaeva ekinshi orındı iyelewge miyasar boldı.
Al, «Babalar miyrası» nominaciyasında bolsa, Qońırat rayonındaǵı 1-sanlı mektepke shekemgi bilimlendiriw shólkeminiń háweskerler toparına teń keletuǵın qarsılas tabılmadı hám olar bas sıylıq iyesine aylandı.

Adilbay Orazov,
Qaraqalpaqstan xabar agentligi sholıwshısı