Ózbekstan kórkem óner akademiyası Qaraqalpaqstan bólimi hám Ózbekstan xudojnikleri awqamı Qaraqalpaqstan bólimi baslaması menen kórgizbe sarayında belgili xudojnik, Ózbekstan hám Qaraqalpaqstan Respublikasına xızmet kórsetken kórkem óner ǵayratkeri, Berdaq atındaǵı sıylıqtıń laureatı Qıdırbay Sayıpovtıń 85 jıllıǵına baǵıshlanǵan ilimiy-ámeliy konferenciya bolıp ótti.

Oǵan kórkem óner izertlewshileri, xudojnikler, mádeniyat xızmetkerleri, jas talant iyeleri hám xudojniktiń shańaraq aǵzaları menen jaqınları qatnastı.
Onda yubilyardıń teatrda birge islesken kásiples dostı, Ózbekstan xalıq artisti, Berdaq atındaǵı sıylıqtıń laureatı, «Mexnat shuhrati», «El-yurt hurmati», «Dwstlik» ordenleri iyesi, «Ózbekstan Respublikasına xızmet kórsetken jaslar ustazı», professor Najimatdin Ańsatbaev, Ózbekstan kórkem óner akademiyası Qaraqalpaqstan bólimi baslıǵı Ulbosın Utegenova, kórkem óner tanıwshı Aygúl Pirnazarova hám basqalar shıǵıp sóylep, Qıdırbay Sayıpovtıń ómiri hám bay dóretiwshilik miyrasın, onıń teatr bezewi, jivopis hám grafikadaǵı jumısların, ulıwma Qaraqalpaqstan súwretlew ónerindegi tutqan ornın úlken húrmet penen atap ótti.
Ásirese, onıń Berdaq atındaǵı Qaraqalpaq mámleketlik akademiyalıq muzıkalı teatrında bas xudojnik sıpatındaǵı jemisli xızmeti húrmet penen tilge alındı.
Maǵlıwmat ushın aytıp ótetuǵın bolsaq, Qıdırbay Sayıpov 1939-jılı Shımbay rayonında tuwılıp, 1952-1957-jılları Tashkent qalasındaǵı P.Benkov atındaǵı súwretshilik óneri uchiliщesiniń jivopis bóliminde oqıydı. Uchiliщeni pitkerip kelip, miynet jolın Berdaq atındaǵı Qaraqalpaq mámleketlik akademiyalıq muzıkalı teatrında xudojnik postanovщik bolıp islewden baslaydı. 1958-jılı teatrdıń bas xudojnik lawazımına tayınlanadı. 1961-1963-jılları Qaraqalpaqstan xudojnikler awqamınıń juwaplı xatkeri, 1965-jıldan ómiriniń aqırına deyin (1972) xudojnikler awqamınıń baslıǵı lawazımların teńdey alıp baradı.
Ol 1957-jıldan óz ómirin teatrǵa baǵıshladı. Atap aytqanda, talantlı xudojnik «Baxıt», «Berdaq», «Aygúl-Abat», «Jaylawda toy», «Aq gúl», «Kúygelek kózli yar», «Adasqan ul», «Qádirdan doktor», «Jas júrekler», «Alpamıs», «Talwas», «Tabıttan shıqqan dawıs», «Qudaǵay keldi», «Qızlar házili», «Eki bayǵa bir malay», «Qaraqalpaq qızı», «Aktrisanıń ıǵbalı», «Nawayı Astrabatda», «Otello» hám basqada bir neshe spektakllerdiń bezew jumısların joqarı dárejede alıp baradı.
Q.Sayıpov ómirlik joldası talantlı aktrisa Záwre Sayıpova menen 3 qız hám bir uldı dúnyaǵa keltirdi. Xudojnik 1972-jılı 33 jasında dúnyadan ótedi.
Qıdırbay Sayıpov – qaraqalpaq súwretlew óneriniń tiykarın salǵan xudojniklerdiń biri. Onıń jaratıp ketken miynetleri qaraqalpaq milliy súwretlew óneriniń tiykarın salıwǵa xızmet etpekte.
Konferenciyada kórkem óner izertlewshileri, xudojnikler, mádeniyat xızmetkerleri hám jas talantlar jıynalıp, xudojniktiń dóretpeleri hám dóretiwshilik jolı haqqında bayanatlar jasadı.

Adilbay Orazov,
Qaraqalpaqstan xabar agentligi sholıwshısı