Ámeldegi konstituciyamızǵa muwapıq, hár kim tikkeley ózi hám basqalar menen birgelikte mámleketlik uyımlar hám shólkemlerge, puqaralardıń ózin-ózi basqarıw uyımlarına, lawazımlı shaxslarǵa yamasa xalıq wákillerine arzalar, usınıslar hám shaǵımlar menen múrájat etiw huqıqına iye ekenligi, arzalar, usınıslar hám shaǵımlar nızamda belgilengen tártipte hám múddetlerde kórip shıǵılıwı shárt ekenligi belgilep qoyılǵan.

Sonlıqtan, Májbúriy orınlaw byurosı Qaraqalpaqstan Respublikası basqarması hám onıń aymaqlıq bólimleri tárepinen fizikalıq hám yuridikalıq táreplerdiń múrájatları menen islesiwge ayrıqsha itibar qaratılıp, múrájatlar nızamda belgilengen múddetlerde sheshilmekte.
Atap aytqanda, Májbúriy orınlaw byurosı Qaraqalpaqstan Respublikası basqarması hám onıń aymaqlıq bólimleriniń hár birinde fizikalıq hám yuridikalıq shaxslardı hám olardıń wákillerin qabıllaw xanaları shólkemlestirilgen bolıp, bul xanalar zamanagóy texnikalar menen úskenelengen.
Sonday-aq, puqaralarımızǵa qolaylıq jaratıw maqsetinde rayonlardıń alıs aymaqlarında jaylasqan, sonday-aq, byuro uyımlarına keliwge qıynalatuǵın shaxslardıń múrájatların aralıqtan turıp, onlayn tárizde qabıl etiw hám kórip shıǵıw sisteması jolǵa qoyılǵan.
Bunnan tısqarı, dúzilgen reje-grafik tiykarında aymaqlarda tikkeley basqarma baslıǵınıń qatnasıwında kóshpeli qabıllawlar da shólkemlestirilmekte.
Xojeli rayonındaǵı Májbúriy orınlaw byurosı imaratında ótkerilgen kóshpeli qabıllawda 7 puqaranıń múrájatı tıńlanıp, olardıń besewi ornında sheshilgen bolsa, qalǵan ekewi ayrıqsha qadaǵalawǵa alınıp, nızamlı sheshiw boyınsha juwapkerlerge tiyisli tapsırmalar berildi.
Házirgi kúnde Májbúriy orınlaw byurosınıń qalalıq hám rayonlıq bólimleri tárepinen bul baǵdardaǵı jumıslar dawam ettirilmekte.

Qaraqalpaqstan xabar agentligi