Nókis qalasındaǵı 1-sanlı sport mektebinde 11-noyabr «Ózbekstan kásiplik awqamı kúni» múnásibeti menen sporttıń mini futbol, voleybol hám stol tennis túrlerinen Kásiplik awqamı spartakiadası bolıp ótti.

Jarısqa respublikamızdıń barlıq qala hám rayonları sport mekteplerinde islewshi xızmetkerler qatnasıp, jeńimpazlıq ushın óz-ara bellesti.
Qızıqlı ótken jarıs sońında stol tennis boyınsha qızlar arasında G. Jalǵasbaeva birinshi orındı jeńip alǵan bolsa, erler arasında M. Rajabov jarıs jeńimpazına aylandı.
Mini futbol boyınsha ótkerilgen jarısta bolsa, Qaraqalpaqstan Respublikası futbol akademiyası xızmetkerleri jámááti birinshi, Nókis qalasındaǵı 2-sanlı sport mektebi ekinshi hám Nókis rayonlıq spoort mektebi komandası sıylı úshinshi orınlardı jeńip alıwǵa miyasar boldı.
Al, voleybol boyınsha ótkerilgen jarısta jeńimpazlıq Respublikalıq sporttıń oyın túrleri hám jeńil atletika sport túrlerine qánigelestirilgen sport mektebine nesip etti.
Jarısta belsendilik kórsetken Beruniy rayonlıq sport mektebi hám Nókis qalasındaǵı 1-sanlı sport mektebi jámáátleri bolsa, gúmis hám qola medalları jeńip aldı.
Jarıs juwmaǵında jeńimpazlar shólkemlestiriwshiler tárepinen tayarlanǵan arnawlı dilpom, medal hám estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı