Házirgi kúnde densawlıqtı saqlaw sistemasında eń áhmiyetli mashqalalardan biri emlewxanalarda gezek kútiw máselesi bolıp esaplanadı. Xalıqtıń úlken bólegi medicinalıq tekseriwden ótiwde yamasa ápiwayı diagnostika processlerinde kóp waqtın jumsaydı. Áyne usı mashqalanı sheshiw maqsetinde Turin politexnika universitetiniń magistrantı Asadbek Wrinov tárepinen islep shıǵılǵan “Body Tester” atlı innovaciyalıq joybar áhmiyetli sheshim sıpatında alǵa qoyıldı.

Bul qollanba “Ózbek ilimpazlarınıń innovaciyalıq ideyaları” joybarı sheńberinde islep shıǵılǵan bolıp, Sawda-sanaat palatası, Joqarı bilimlendiriw, ilim hám innovaciyalar ministrligi jáne Ilimler akademiyası menen birgelikte ámelge asırılmaqta. Joybar mámleketimizde jas ilimpazlardıń ideyaların ámeliyatqa engiziw, ilim nátiyjelerin real ekonomikalıq paydaǵa aylandırıwǵa xızmet etpekte.
Búgingi kúnde xalıq kóplegen emlewxanalarda ápiwayı tekseriwden ótiw hám diagnostika ushın saatlap gezekte turıwǵa májbúr. Sonıń menen birge, nawqastıń medicinalıq maǵlıwmatları qaǵaz túrinde usınılıp, bul faktorlar bir qansha qolaysızlıqlarǵa sebep boladı. Bul tek ǵana waqıt joǵaltıw emes, al medicina xızmetkerleriniń artıqsha bántligine de sebep boladı. “Body Tester” joybarınıń tiykarǵı ideyası bul processti avtomatlastırıw, nawqastıń dene jaǵdayın qısqa waqıt ishinde tallap, dáslepki maǵlıwmatlardı olarǵa elektron jetkerip beriwden ibarat.
Asadbek Wrinovtıń bul baslaması tek ǵana medicina tarawındaǵı mashqalanı sheshiwge emes, al ilim hám biznes arasındaǵı birge islesiwdi bekkemlewge de xızmet etedi. Sebebi joybar nátiyjesi sıpatında jaratılǵan qurılmanı islep shıǵarıw, onı densawlıqtı saqlaw mákemelerine jetkeriw hám texnikalıq xızmet kórsetiw ushın jeke menshik sektor menen birge islesiw zárúr.
Bul baǵdarda “Ózbek ilimpazlarınıń innovaciyalıq ideyaları” joybarı jas izertlewshilerge texnikalıq, huqıqıy hám finanslıq járdem kórsetpekte. Olardıń qollanbaları kommerciyalastırıw basqıshına shıǵarılıp, jergilikli hám sırt el investorlarınıń itibarına usınılmaqta.

Dildora DWSMATOVA, ÓzA