Qaraqalpaqstan Respublikası Bajıxana basqarmasında Nókis qalasındaǵı “Múriwbet” internat úyinde jasawshı mayıplıǵı bar hayal-qızlar tárepinen jaratılǵan qol miynetleri yarmarkası bolıp ótti. Bul yarmarkada basqarma hám post inspektorı xızmetkerleri hám sırtqı ekonomikalıq jumıs alıp barıwshı isbilermenler qatnastı.

Yarmarkada “Múriwbet úyi” hayal-qızları tárepinen tigilgen kesteshilik jumısları, milliy naǵıslar, bezekli buyımlar hám hár qıylı qol miynetleri kórsetildi.
Bul bezelgen buyımlar – barlıǵı mehir, sabır hám dóretiwshilik penen jaratılǵan bolıp, hayal-qızlardıń dóretiwshiligin, miynet súygishligin hám milliy qádiriyatlarǵa bolǵan sadıqlıǵın jáne bir márte kórsetti.
Bunday ilajlar jámiyetimizde hayal-qızlarǵa bolǵan húrmet hám itibardı jáne de arttırıw, olardı sociallıq turmısqa jedel tartıw boyınsha úlken áhmiyetke iye.
Yarmarkadan túsken qarjı “Múriwbet úyi”niń materiallıq bazasın bekkemlew, sonday-aq, ol jerdegi hayal-qızlar hám tárbiyalanıwshılardıń jańa dóretiwshilik jumısların ámelge asırıwǵa túrtki boladı.
Bajıxana xızmetkerleri hám ilaj qatnasıwshıları usı iygilikli iske óz úleslerin qosıp, hayal-qızlardıń dóretiwshiligin qollap-quwatlaw hám olardıń miynetin qádirlewge háreket etti. Olar tárepinen satıp alınǵan hár bir shıǵarma – tek ǵana sawǵa emes, al mehir hám tán alıw tımsalına aylandı.

Qaraqalpaqstan xabar agentligi