Qaraqalpaqstan Respublikası Bajıxana basqarmasında ruwxıylıq hám kitapqumarlıq mádeniyatın úgit-násiyatlaw maqsetinde “Kitap yarmarkası” shólkemlestirildi.

Bul ilaj xızmetkerler arasında kitap oqıwǵa bolǵan qızıǵıwshılıqtı arttırıw, ruwxıy baylıq hám bilim sheńberin keńeytiw, sonday-aq, kitapqumarlıq mádeniyatın rawajlandırıwǵa qaratılǵan.
Yarmarkada túrli baspalar tárepinen basıp shıǵarılǵan kórkem, ilimiy, tariyxıy hám aǵartıwshılıq baǵdardaǵı kitaplar keń tańlawda usınıldı. Xızmetkerler ózlerine unaǵan shıǵarmalardı satıp alıw, usınıslar alıw hám bir-biri menen oqıǵan kitapları haqqında pikir alısıw imkaniyatına iye boldı. Sonday-aq, ıqlasbentler hám kitapqumar xızmetkerler tárepinen satıp alınǵan kitaplar basqarma kitapxanasına óz atınan estelik sıpatında tapsırıldı.
Yarmarkada atap ótilgenindey, kitap – insannıń oy-pikiri, ruwxıy jetiklik hám ilim deregi bolıp, ol hár bir xızmetkerdiń ómirinde turaqlı joldasqa aylanıwı zárúr.
“Kitap yarmarkası” tek ǵana sawda ilajı emes, al ruwxıy-aǵartıwshılıq ushırasıw, pikir alısıw hám kitapqa bolǵan súyispenshilikti jáne de bekkemlewshi jaqsı dástúrge aylandı.

Qaraqalpaqstan xabar agentligi