Házirgi kúnleri kópshilik sport jankúyerleriniń dıqqatı Saudiya Arabstanınıń Ar-Riyad qalasında ótkerilip atırǵan VI Islam tilekleslik oyınlarına qaratılǵan.

Bul jerde sporttıń kóplegen túrleri boyınsha jarıslar ótkerilip, onda mámleketimiz sport delegaciyası tabıslı qatnasıp, ulıwma komandalıq esapta medallar toplaw boyınsha Túrkiyadan soń ekinshi orındı iyelep kelmekte.
Quwanıshlı tárepi sonda, bul jarısta boks boyınsha -60 kg salmaqta Ózbekstan saylandı komandası quramında qatnasıp atırǵan Madiyar Daniyarov altın medal iyesine aylandı.
Atap aytqanda, boksshimiz sherek finalda liviyalı Muayid Okashahtı ekinshi raundta texnik nokautqa ushıratqan bolsa, yarım finalda iranlı Daniyal Shahbaxshtı 4:1 esabında jeńip, final jollamasın qolǵa kirgizdi.
Al, chempionlıq ushın ótkeriliwi tiyis final bellesiwinde ázerbayjanlı Mahammadali Gasimzada bellesiwden bas tartıp, jeńis Madiyar Daniyarovqa berildi hám jerlesimiz VI Islam tilekleslik oyınlarınıń chempionı ataǵına miyasar boldı.
Óz gezeginde, bizler elimiz maqtanıshı Madiyar Daniyarovtı, onıń ustazların hám ata-anasın bul tabısı menen qızǵın qutlıqlap, aldaǵı jarıslarda da chempionlıqtı qolǵa kirgize beriwine tilekleslik bildirip qalamız.

Adilbay Orazov,
Qaraqalpaqstan xabar agentligi sholıwshısı.