Ózbekstan Respublikası Prezidenti Shavkat Mirziyoev Tashkent mámleketlik medicina universitetine barıp, mámleketimizdiń medicina hám farmacevtika xızmetkerleri menen ushırasıw ótkerdi.

Ótkerilgen ushırasıwda Nókis qalasınan Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ministrler Keńesiniń Baslıǵı Farhod Ermanov hám bir topar taraw wákilleri videobaylanıs arqalı qatnastı.
Ushırasıw aldınan Prezidentimizdiń «Medicina xızmetkerleri kúni múnásibeti menen taraw xızmetkerleriniń bir toparın sıylıqlaw haqqında»ǵı pármanı menen respublikamız boyınsha sıylıqlanǵan taraw wákillerine Qaraqalpaqstan Respublikası Joqarǵı Keńesiniń Baslıǵı A.Orınbaev mámleketlik sıylıqlardı tapsırdı.
– 35 jıldan beri usı tarawda jumıs islep kiyatırman, – deydi Beruniy rayonlıq medicina birlespesiniń náresteler bóliminiń baslıǵı Erkinay Marimova. – Usı jıllar ishinde rayonımızda qanshama ana jas bosanıp, olardıń quwanıshına sherik bolıw nesip etti. Meniń azı-kem islegen miynetimidi inabatqa alınıp, Prezidentimizdiń arnawlı pármanı tiykarında «Soǵlom turmush» medalı menen sıylıqlanıp atırman. Bunıń ushın taraw basshılarına, húrmetli Jurtbasshımızǵa úlken raxmet aytaman.
Bunnan soń mámleketimiz basshısı menen ushırasıw ótkerilip, onda sistemadaǵı reformalar nátiyjeliligi hám kelesi jılda ámelge asırılatuǵın baslı wazıypalar talqılandı.

Qaraqalpaqstan xabar agentligi