Tórtkúl, Ellikqala hám Beruniy rayonları hákimliklerinde Suw xojalıǵı ministrliginiń juwapkerleri tárepinen klaster hám fermer xojalıqlarınıń basshıları, qurılıs, jumıstı bólip alıp islewshi kárxanalardıń wákilleriniń qatnasıwında suwdı únemleytuǵın texnologiyalardı engiziw máseleleri keńnen dodalandı.

Ilajlarda Qaraqalpaqstan Respublikası Suw xojalıǵı ministri B.Yusupov, Ózbekstan Respublikası Suw xojalıǵı ministrliginiń juwaplı xızmetkeri N.Xudayberdiev hám rayon hákimleriniń orınbasarları tiyisli qararlar tiykarında suwdı únemlewshi texnologiyalardı engizgen fermerlerge subsidiya hám banklerde jeńilletilgen kreditler ajıratılıp atırǵanın, suwdı únemlewshi texnologiyalardıń abzallıqların keńnen túsindirdi.
Sonday-aq, kelesi jıldıń zúrááti ushın egilgen ǵálle maydanlarına jawınlatıp suwǵarıw texnologiyaların engiziw ushın “suvkredit.uz” elektron sisteması arqalı arzalar beriw tártip-qaǵıydaları haqqında da tolıq maǵlıwmatlar berildi.
Ilajlarda zamanagóy innovaciyalıq suwǵarıw texnologiyaları (quyash panelleri arqalı kóshpeli suw jetkerip beriwshi suwǵarıw sisteması) menen jaqınnan tanıstırıldı.
Ilajlar sheńberinde Suw xojalıǵı juwapkerleri hám suwdı únemlewshi texnologiyalardı engiziwge qálewin bildirgen fermer xojalıqları, qurılıs shólkemleriniń wákilleri menen ashıq sóylesiwler de shólkemlestirildi. Onda suwdı únemlewshi texnologiyalardı engiziwde júzege keliwi múmkin bolǵan mashqalalar hám olardı saplastırıw máseleleri de dodalandı.
Qatnasıwshılar suwdı únemleytuǵın texnologiyalardı engiziw boyınsha ózlerin qızıqtırǵan sorawlarǵa qánigelerden juwaplar aldı.

Qaraqalpaqstan xabar agentligi