Qaraqalpaqstan Respublikası prokurorı Sh.Aminovtıń basshılıǵında bolıp ótken gezektegi keńeytilgen májiliste gúzgi-qısqı máwsimge tayarlıq, janılǵı-energetika hám ishimlik suwı resurslarınan aqılǵa uǵras paydalanıw, qurılıs tarawındaǵı mámleketlik baǵdarlamalardı ámelge asırıw máseleleri sın kózqarastan dodalandı.

Ministrler Kabinetiniń 2025-jıl 7-maydaǵı qararına tiykarlanıp sociallıq taraw obektlerinde ıssılıq sistemasın jańalaw, ısıtıw qazanları hám gaz janǵıshların jańasına almastırıw, baqshalarǵa geliokollektor ornatıw boyınsha jumıslardı tolıq juwmaqlaw, xalıqqa hám sociallıq taraw obektlerine kómirdi tolıq hám óz waqtında jetkerip beriw, qurılıs tarawındaǵı mashqalalardı saplastırıw, qarjılardı ózlestiriw, paydalanıwǵa tapsırılǵan obektlerdi qısqa múddetlerde alternativ ıssılıq sistemaları menen támiyinlew baǵdarındaǵı jumıs boyınsha juwapkerlerdiń esabatları tıńlandı.
Májilis juwmaǵında, máwsimge tayar bolmaǵan sociallıq taraw obektleriniń mashqalaların saplastırıw, janılǵı-energetika resurslarınan nızamsız paydalanıw boyınsha reyd ilajların kúsheytiw, ishimlik suwı resurslarınan bar debitor qarızdarlıqlardı qaplaw, sonday-aq, qurılıs tarawındaǵı mámleketlik baǵdarlamalardıń orınlanıwı, obektlerdi óz múddetinde hám sapalı tapsırıw, jumıslardı jámiyetlik qadaǵalaw tiykarında shólkemlestiriw boyınsha juwapker uyım hám shólkemlerge tapsırma hám kórsetpeler berildi.

Qaraqalpaqstan xabar agentligi.