Nókis qalasında Qaraqalpaqstan Respublikası Joqarǵı Keńesiniń isbilermenler ushın shólkemlestirilgen múrájat botına kelip túsken mashqalalarǵa unamlı sheshim tabıw maqsetinde Joqarǵı Keńes Baslıǵı Amanbay Orınbaevtıń qabıllawı ótkerildi.

Onda eń dáslep respublikamız basshısı sońǵı jılları Ózbekstan Respublikası Prezidenti Sh.Mirziyoev tárepinen Qaraqalpaqstanda isbilermenlikti rawajlandırıw hám onı qollap-quwatlaw, investiciyalıq tartımlılıqtı arttırıw boyınsha qabıl etilgen arnawlı párman hám qararları tiykarında jaratılǵan imkaniyatlardı keń túrde atap ótip, bunday qolaylılıqlardan nátiyjeli paydalanıw zárúrligine toqtaldı.
Bunnan soń isbilermenlerdiń múrájatları tıńlanıp, olardıń bildirgen máselelerine óz ornında sheshimin tabıw ilajları kórildi.
Atap aytqanda, qabıllaw dawamında isbilermenlikti rawajlandırıw baǵdarında ushırasıp atırǵan mashqalalar, olardı qarjılandırıw hám kredit ajıratıw máseleleri, kadastr hújjetlerin rásmiylestiriw, jer orınların ajıratıw, byurokratiyalıq tosqınlıqlar, islep shıǵarıw hám óndiristi keńeytiw baǵdarındaǵı múrájatlar bildirildi.
Ushırasıwda isbilermenler tárepinen bildirilgen máselelerdiń basım kópshiligine ornında sheshimin tabıw ilajları kórilip, belgili waqıt talap etiletuǵın múrájatlar Qaraqalpaqstan Respublikası Joqarǵı Keńes Baslıǵınıń jeke qadaǵalawına alındı hám olardı tez pursatta unamlı sheshiw boyınsha tiyisli taraw basshılarına tapsırmalar berildi.

Qaraqalpaqstan xabar agentligi