Qádiriyatlarımızda shańaraqtı saqlaw, onıń bekkemligin támiyinlew iygilikli ámellerden bolıp tabıladı. Bul baǵdarda Májbúriy orınlaw byurosı xızmetkerleri aliment qarızdarlıǵın óndiriw menen birge, ajırasqan shańaraqlardı jarastırıwǵa da úles qospaqta.

Máhálle hám jámiyetshilik wákilleri, turmıs tájiriybesine iye nuranıylar, din wákilleri hám basqalar menen birgelikte túsinik jumısları alıp barılmaqta.
Atap aytqanda, Puqaralıq isleri boyınsha Qońırat rayonlararalıq sudınıń 2025-jıl 22-yanvardaǵı orınlaw hújjetine bola, J.J.dan burınǵı ómirlik joldasınıń paydasına, onıń tárbiyasındaǵı erjetpegen úsh perzentiniń támiynatı ushın 18 million sum muǵdarında aliment óndiriw belgilengen.
Usı sud buyrıǵı tiykarında Májbúriy orınlaw byurosı Qanlıkól rayonlıq bóliminiń mámleketlik orınlawshısı tárepinen orınlaw isi qozǵatıldı hám qarızdar jasaytuǵın mánzilge óndiriw maqsetinde bir neshe márte barılǵanda Qazaqstan Respublikasına shıǵıp ketkenligi anıqlanıp, oǵan izlew járiyalanǵan.
Bıyılǵı jıldıń 17-oktyabr kúni Byuronıń Qaraqalpaqstan Respublikası izlew sekciyası tárepinen alıp barılǵan operativ izlew ilajları nátiyjesinde qarızdar Qanlıkól rayonınan tabılıp, ajırasqan shańaraqtı jarastırıw maqsetinde qarızdar hám óndiriwshige túsinik jumısları alıp barıldı. Nátiyjede óndiriwshi birge jasaw niyetin bildirip, aliment óndiriw haqqındaǵı sud qararınıń orınlanıwın tamamlawdı sorap, ótinish xatın tapsırǵan.
Erjetpegen úsh perzent bolsa, jáne tolıq shańaraq ortalıǵında kámalǵa keletuǵın boldı.

Qaraqalpaqstan xabar agentligi