Ámiwdárya rayonı hákimliginde Ózbekstan Respublikası Oliy Majlisi Senatı apparatınıń Aymaqlıq wákillikli uyımlar jumısın úyreniw orayı tárepinen “Jergilikli Keńeslerdiń jumısın úlgili shólkemlestiriw” atamasında kórgizbeli seminar shólkemlestirildi.

Ilajda Qaraqalpaqstan Respublikası Joqarǵı Keńesiniń komitet baslıǵı Sharapat Otemisov, xalıq deputatları Ámiwdárya rayonlıq Keńesiniń baslıǵı, rayon hákimi Sobir Xojametov, Qaraqalpaqstan Respublikası Joqarǵı Keńesiniń hám rayonlıq Keńestiń deputatları, jergilikli Keńestiń sekretariatı xızmetkerleri, Keńes janındaǵı “Jaslar másláhát toparı”nıń aǵzaları, siyasiy partiyalardıń basshıları hám ǵalaba xabar qurallarınıń wákilleri qatnastı.
Seminar dawamında “Xalıq deputatları jergilikli Keńesiniń turaqlı komissiyalarınıń jumısın nátiyjeli shólkemlestiriw” atamasında bayanat tıńlanıp, tájiriybe almasıldı. Deputatlar tárepinen rayonnıń sociallıq-ekonomikalıq rawajlanıwına qosıp atırǵan úlesi, olardıń xalıqtıń mashqalaların sheshiwdegi ornı, sonday-aq, mámleketlik uyımlardıń jumısında ashıq-aydınlıqtı támiyinlew máseleleri dodalandı.
Ilaj sheńberinde qatnasıwshılar jergilikli Keńestiń jumısı, deputatlardıń baslamaları hám olardıń orınlardaǵı xalıq penen óz-ara birge islesiw mexanizmleri menen jaqınnan tanıstı.
Usı seminar jergilikli Keńesler jumısın jáne de jetilistiriw, deputatlardıń baslamaların qollap-quwatlaw hám olardıń jámiyetlik turmıstaǵı rolin bekkemlewge xızmet etedi.

Qaraqalpaqstan xabar agentligi.