Kópshiliktiń xabarı bolǵanınday, Ózbekstan Respublikası Prezidentiniń 2025-jıl 19-sentyabrdegi «Ózbekstan Respublikasında xalıq hám awıl xojalıǵın dizimge alıw ilajın ótkeriw haqqında»ǵı Pármanınıń orınlanıwın támiyinlew maqsetinde házirgi kúnleri respublikamızda qızǵın tayarlıq jumısları alıp barılmaqta.

Usı múnásibet penen Nókis qalasında Qaraqalpaqstan Respublikası Ministrler Keńesiniń Baslıǵı Farhod Ermanov basshılıǵında Respublikalıq kólemde shólkemlestirilgen shtabtıń gezektegi májilisi bolıp ótti.
Májiliske Ózbekstan Respublikasınan xalıqtı hám awıl xojalıǵın dizimge alıw ilajın ótkeriwdi shólkemlestiriw boyınsha biriktirilgen komissiya baslıǵı suw xojalıǵı ministri Sh. Hamroev hám respublikalıq komissiya aǵzaları qatnastı.
Májilis dawamında xalıqtıń demografiyalıq jaǵdayı, sociallıq-ekonomikalıq kórsetkishleri, jasaw dárejesi hám abadanlıǵı, sonday-aq, awıl xojalıǵınıń házirgi jaǵdayı haqqındaǵı maǵlıwmatlardı anıq hám isenimli túrde qáliplestiriw máseleleri hár tárepleme dodalandı. Sonıń menen birge, dizimge alıw procesi arqalı xalıqtı tiykarǵı túrdegi awıl xojalıǵı ónimleri menen támiyinlew perspektivaların tallaw hám bahalaw ushın zárúr bolǵan maǵlıwmatlar bazasın jaratıw máselelerine de ayrıqsha itibar qaratıldı.
Májiliste Prezident Pármanınıń orınlanıwın nátiyjeli támiyinlew maqsetinde rayonda shólkemlestirilgen shtablardıń tiykarǵı wazıypaları, orınlanıwı kerek bolǵan jumıslar, ámelge asırılatuǵın shólkemlestiriwshilik hám ámeliy is-ilajlar rejesi belgilep alındı. Sonday-aq, dizimge alıw jumıslarında qatnasıwshı xızmetkerlerdiń mamanlıǵın arttırıw, xalıqqa bul processtiń mánisi hám áhmiyetin túsindiriwge qaratılǵan úgit-násiyat jumısların kúsheytiw zárúrligi atap ótildi.
Májilis juwmaǵında Qaraqalpaqstan Respublikası Ministrler Keńesi Baslıǵı Farhod Ermanov taraw juwapkerlerine anıq wazıypalar júklep, jumıslardı sapalı hám belgilengen múddetlerde orınlaw boyınsha tapsırmalar berdi.

Qaraqalpaqstan xabar agentligi