Xalıqaralıq keńpeyillik kúni múnásibeti menen Ájiniyaz atındaǵı Nókis mámleketlik pedagogikalıq institutında «Ózbekstan – ulıwma úyimiz» súreni tiykarında «Biz – bir shańaraq perzentlerimiz!» atamasında doslıq festivalı bolıp ótti.

Ilajǵa Ózbekstan Respublikası Ministrler Kabineti janındaǵı Imam Buxariy xalıqaralıq ilimiy-izertlew orayınıń bólim baslıǵı, tariyx ilimleri boyınsha filosofiya doktorı Jonibek Jumaev, usı oraydıń úlken ilimiy xızmetkeri Abdulvosit Mamadaliev, oraydıń diniy-aǵartıwshılıq ilajlar bóliminiń ilimiy xızmetkeri Bayozxon Mahmudov hám basqalar qatnasıp, Ózbekstandaǵı keńpeyillik siyasatınıń turmısımızdaǵı áhmiyetin atap ótti. Ózbekstanda sońǵı jılları bul baǵdarda ámelge asırılıp atırǵan reformalar keń túrde dodalandı.
Festival qatnasıwshıları dáslep Ájiniyaz muzeyinde bolıp, bul jerdegi eksponatlar menen tanıstı. Miymanlar bul jerde ullı sóz zergeri Ájiniyaz Qosıbay ulınıń ómiri hám dóretiwshiligi, sonday-aq, institut tariyxı boyınsha bahalı maǵlıwmatlarǵa iye boldı.
Sonday-aq, festival sheńberinde instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basshılıǵında «Jawızlıqqa qarsı – aǵartıwshılıq penen» ideyası tiykarında ruwxıy-aǵartıwshılıq sáwbetleri shólkemlestirilip, onda xalıqlar arasındaǵı tatıwlıq, keńpeyillik, milletler arasındaǵı doslıq hám awızbirshiliktiń jámiyettegi tutqan ornı haqqında sóz etildi.
– Elimizde keńpeyillik siyasiy yamasa aǵartıwshılıq súren emes, al, xalqımızdıń turmıs tárizine aylanǵan, – deydi Qaraqalpaqstan Respublikası Ministrler Keńesiniń Din isleri boyınsha bas qánigesi Xudaybergen Nezamatov. – Búgingi kúnde bul princip mámleket siyasatınan tısqarı hár bir shańaraq, máhálle hám hár bir insan qálbinde óz sáwleleniwin tappaqta.
Ilaj instituttıń «Tumaris» xalıq ansambli aǵzaları hám qábiletli jaslarınıń atqarıwındaǵı koncert baǵdarlaması menen dawam etti.

Qaraqalpaqstan xabar agentligi.