Elimizde jaslardı watansúyiwshilik, milliy dástúr hám qádiriyatlarımızǵa húrmet ruwxında tárbiyalaw, olardı ruwxıy jetik, fizikalıq jaqtan salamat etip kamalǵa keltiriw jáne huqıqları menen máplerin qorǵaw baǵdarında belgili jumıslar ámelge asırılmaqta.

Atap aytqanda, Jaslar isleri agentligi tárepinen jigit-qızlardıń dúnyaǵa kózqarasın ósiriwge qaratılǵan joybarlar jolǵa qoyılmaqta.
Áne, usılardan biri «WikiMarafon» joybarı bolıp, internet áleminde ózbek tiliniń abırayın hám imkaniyatların keńeytiwge xızmet etpekte. 2022-jılı 20-mayda ózbek Vikipediyasın bayıtıw arqalı ózbek tilin rawajlandırıwǵa qaratılǵan «WikiMarafon» joybarı baslanǵanında ózbek Vikipediyasındaǵı maqalalar sanı 140 mıń átirapında edi. Bul san búgingi kúnge kelip 309 mıńnan arttı. Ondaǵı redakciyalar sanı bolsa 2,5 millionnan 5,7 millionǵa ósken. Maqalalardıń tiykarǵısı mámleketimiz jaslarınıń jumısınan ibarat.
Búgingi kúnge shekem, joybar sebepli ózbek tilindegi Vikipediyadaǵı paydalanıwshılardıń sanı 880 nen artıp, betlerdiń sanı 1,1 millionǵa jetti. Házirgi waqıtta ondaǵı sózlerdiń sanı 63 millionnan artqan. Bul arqalı jáhán reytingindegi ornın jáne de bekkemlep, 62-orınnan 40-orınǵa kóterildi.
– Házirgi kúnge kelip ózbekshe Vikipediya Oraylıq Aziya mámleketleri Vikipediyası arasında 1-orındı, túrkiy tiller arasında bolsa 3-orındı iyelemekte, – dedi joybar basshısı Shohjahon Sobirov. – Bul sanlar qısqa múddet ishinde erisilgen úlken jetiskenliklerdiń tek ǵana bir bólegi. «WikiMarafon» hár bir jastı óz úlesin qosıwǵa shaqıradı: maqala jazıw, redaktorlaw, maǵlıwmatlardı ózbek tilinde bayıtıw arqalı biz óz tilimizdi globallıq saxnaǵa alıp shıǵamız. Joybar sheńberinde kitapqumar jaslar ushın bir neshe tańlawlardı ótkerdik. Student hám jaslar arasında ruwxıy-aǵartıwshılıq hám tárbiyalıq jumıslardıń nátiyjeliligin arttırıw, olardıń sabaqtan bos waqıtların mazmunlı shólkemlestiriw, kitapqumarlıq mádeniyatın arttırıw maqsetinde shólkemlestirilgen tańlawlarda kóplegen jaslarımız qatnasıp kitaplar toplamların qolǵa kirgizdi.
Sonday-aq, ««WikiMarafon» joybarı sheńberinde jaslar “WikiIELTS” tańlawında qatnasıw arqalı IELTS imtixanın biypul tapsırıw imkaniyatın beretuǵın vaucherlerdi jeńip aldı. Tańlaw shártleri júdá ápiwayı bolıp, dáslep qatnasıwshılar bot arqalı dizimnen ótti, olarǵa berilgen tekstti ózbek tiline sheberlik penen awdarıp, qayta júkledi.
Bir sóz benen aytqanda, «WikiMarafon» joybarı jaslarǵa keń imkaniyatlar jaratıw menen birge, ózbek tiliniń abırayın arttırıwǵa xızmet etpekte.

Gulnoza Boboeva, ÓzA