Xalıqtıń turmısı hám qala tazalıǵına tikkeley tásir etetuǵın shıǵındı tasıw xızmetlerinde sapanıń tómenlewi hám tiykarsız qarızdarlıq jaǵdayları kóbeymekte.

Usı múnásibet penen Báseki komiteti usı tarawdaǵı kárxanalardıń jumısın úyrenip, tiyisli kórsetpeler jiberdi.
Báseki komiteti hám onıń aymaqlıq basqarmalarına puqaralardan qattı turmıslıq shıǵındı tasıw xızmetlerin kórsetiwshi shólkemler tárepinen tiykarsız qarızdarlıq esaplanıwı, shıǵındılar belgilengen dáwirde alıp ketilmey atırǵanı hám sapasız xızmet kórsetilip atırǵanı sıyaqlı máseleler boyınsha usı jıldıń ótken toǵız ayında mıńǵa shamalas múrájat kelip túsken.
Múrájatlardıń úlken bólegi Namangan, Qashqadárya, Samarqand, Sırdárya, Tashkent, Ferǵana hám Xorezm wálayatlarına tiyisli.
Sonıń menen bir qatarda, Komitet Qaraqalpaqstan Respublikası, Ándijan, Qashqadárya, Namangan, Samarqand, Surxandárya, Sırdárya, Tashkent hám Ferǵana wálayatlarında bul baǵdarda úyreniwler ótkergeninde tutınıwshılarǵa kórsetilmegen xızmetler ushın qarızdarlıq esaplanǵanı da anıqlanǵan.
Mısal ushın, Sırdárya wálayatında xızmet kórsetiwshi shólkem tárepinen turmıslıq shıǵındılardı alıp shıǵıp ketiw kestesine ámel etilmegenligi aqıbetinde qorshaǵan ortalıqta shıǵındılar kóp muǵdarda jıynalǵan, biraq soǵan qaramastan puqaralar kórsetilmegen xızmetler ushın haqı tólegen. Qayta islengen esap-sanaqlar nátiyjesinde 628 mln. sum tutınıwshılardıń paydasına sheshiliwi támiyinlendi.
Joqarıdaǵılarǵa tiykarlanıp, Komitet tárepinen elatlı punktlerden qattı turmıslıq shıǵındılardı belgilengen múddet hám sapada tasıp shıǵarılıwın támiyinlew hám tiykarsız qarızdarlıq esaplanıwınıń aldın alıw ilajların kóriw boyınsha Shıǵındılardı basqarıw hám cirkulyar ekonomikanı rawajlandırıw agentligine kórsetpe jiberildi.

Nigora Rahmonova, ÓzA