Búgingi kúnde barlıq tarawlarda xalıqqa qolaylıq jaratıw, qalaberdi, sanlastırıw sistemasın bunnan bılay da jetilistiriwge itibar qaratılmaqta. Bunnan gózlengen maqset kórsetilip atırǵan xızmetlerdiń sapasın arttırıw hám waqıttıń bosqa jumsalıwınıń aldın alıwdan ibarat.

Sonıń ishinde, jámiyetlik transporttan paydalanıw boyınsha da jańa tártip-qaǵıydalar islep shıǵıldı. Atap aytqanda, jol haqı tólemlerin karta arqalı ámelge asırıw engizilip, onda xalıqqa bir qatar jeńillikler hám qolaylıqlar berildi.
Biraq, hár qashan da reformalar jeterli dárejede túsinilmeydi. Onıń shegaraların bilip-bilmey buzıp ótiwshiler tabıladı. Bundaylar, sózsiz, rawajlanıw dushpanları.
Gáp sonda, búgingi kúnde avtobuslardan paydalanıp, tólemdi ámelge asırmay atırǵan jolawshılar da kóp ushıraspaqta. Bunıń aqıbetleri turaqlı eskertiledi.
– Men jámiyetlik transportlardan, atap aytqanda, avtobustan turaqlı paydalanaman, – deydi Áliysher Nawayı atındaǵı Tashkent mámleketlik ózbek tili hám ádebiyatı universitetiniń úshinshi kurs studenti Shaxriyor Boymirzaev. – Geyde avtobustan túsip atırǵanda jol haqısın tólemey ketip baratırǵan jolawshılarǵa kózim túsedi. Bul meni de tańlandıradı, sonıń menen birge ashıwlandıradı. Sebebi, adam 1700 sum únemlep, hesh qashan bay bolıp qalmaydı. Bundaylardıń nızamlardı húrmet etpewi hújdansızlıqtan dep bilemen. Sebebi hújdanına boysınǵan adamǵa hesh qanday qaǵıyda ólshem bola almaydı.
Haqıyqatında da, rawajlanıwdıń joqarılawı kishi faktorlardan baslanadı. Buǵan tek ǵana húkimet emes, al pútkil millet juwapker. Solay eken, hár birimiz óz juwapkershiligimizge biypárwa bolmawımız shárt. Sonda ǵana birinshi gezekte adamgershiligimizge, qalaberdi, usı áziz elimizge múnásip bola alamız. Óytkeni, Watanımızdıń rawajlanıwına úles qosıwshılar qatarında turıw maqtanıshınan ayırılmayıq. Eń bolmasa, buǵan tosqınlıq etpew de paydadan awlaq emes.

Sherbek Islomov, ÓzA