Bir neshe jıllardan berli elimizde Belarus Respublikası mádeniyat kúnlerin ótkeriw jaqsı dástúrge aylanǵan.
Belarus xalqı mádeniyatında tariyxıy dástúrlerge sadıqlıq, tábiyatqa, Jerge mehir, ózine tán biytákirar koloriti ústinlik etedi.

Bul mámlekettiń dóretiwshileri elimizde turaqlı ótkeriletuǵın xalıqaralıq kórgizbeler, dóretiwshilik festivallarǵa turaqlı qatnasıp keledi. Házirgi waqıtta ózbekstanlı jazıwshı hám shayırlardıń shıǵarmaları turaqlı túrde Belarusta basıp shıǵarılmaqta. Dóretiwshilerimiz bul mámlekette óz kórkem ónerin túrli kórgizbeler hám koncertlerde kórsetiwi de jaqsı dástúrge aylanǵan.
Ózbekstanda Belarus mádeniyatı kúnleri sheńberinde usı mámleket kinofilmleriniń kórsetiliwin óz ishine alǵan ilajlar, koncertler, eki mámleket dóretiwshi zıyalılarınıń ushırasıwları hám sóylesiwleri bolıp ótpekte.
Áliysher Nawayı atındaǵı Ózbekstan mámleketlik akademiyalıq úlken teatrında Ózbekstanda Belarus mádeniyatı kúnleriniń saltanatlı ashılıw máresimi bolıp ótti.
Onda kórkem óner millet hám shegara bilmes qúdiretke iye ruwxıy qural ekeni ayrıqsha atap ótildi. Haqıyqatında da, keńpeyillik, miyrim-shápáát, jaqsılıqqa tilekleslik xalıqlarımız arasındaǵı uqsaslıqtı quraydı. Saltanatlı ilajda doslıq, awızbirshilik, tuwısqanlıq, tınıshlıq hám rawajlanıw, mehir-muhabbattı ulıǵlaytuǵın qosıqlar atqarıldı.
***
Ózbekstan Respublikasında ótkerilip atırǵan Belarus Respublikası mádeniyat kúnleri sheńberinde usı mámlekettiń mádeniyat ministri Ruslan CHerneskiy Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komitetiniń baslıǵı Qahramon Sariev penen birgelikte Komitet janındaǵı milliy mádeniy oraylar pavilonınıń jumısı menen jaqınnan tanıstı.
Belarus Respublikası Mádeniyat ministri R.CHerneskiy Ózbekstanda túrli millet hám xalıq wákillerine bolǵan húrmet hám itibardı joqarı bahaladı.
Tanısıw sheńberinde milliy mádeniy oraylardıń wákilleri hám háwesker jaslar hám olardıń dóretiwshilik jámáátleri hár qıylı milliy nama-qosıqlar, dástúriy hám zamanagóy ayaq oyınlar, túrli milletlerdiń muzıkalıq miyrasınan úlgilerdi usındı.

Nazokat Usmonova, ÓzAnıń xabarshısı