Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń baslıǵı A.Ázamxojaev tárepinen Qaraqalpaqstan Respublikasında sırt el investiciyaların hám grantlarda tartıw, eksport kólemin arttırıw, turizm potencialın rawajlandırıw hám jańa jumıs orınların jaratıw arqalı xalıqtıń abadanlıǵın arttırıwǵa qaratılǵan jumıslar úyrenildi.

Úyreniw dawamında Nókis qalası, Shımbay rayonı hám “Nókis” erkin ekonomikalıq zonasında jumıs alıp barıp atırǵan kárxanalar hám jańadan shólkemlestirilip atırǵan joybarlardıń jaǵdayı menen jaqınnan tanıstı.
Sanaat, awıl xojalıǵı, qayta islew hám xızmet kórsetiw tarawlarındaǵı imkaniyatlar tallanıp, aymaqta ámelge asırılıp atırǵan ekonomikalıq reformalardıń nátiyjeliligi dodalandı.
Atap ótiliwinshe, mámleketimiz basshısınıń baslaması hám jaratqan qolaylı investiciyalıq ortalıq nátiyjesinde Qaraqalpaqstan Respublikasında sırt el investiciyasınıń kólemi sońǵı jılda 3 esege artqan.
Ushırasıwlar dawamında jergilikli isbilermenler, hákimlikler hám tarawlıq shólkemlerdiń wákilleriniń qatnasıwında ekonomikalıq jedellikti bunnan bılay da kúsheytiw, joybarlardı qarjılandırıw hám jańa investorlardı tartıw boyınsha usınıslar islep shıǵıldı.
Sonday-aq, turizm infrastrukturasın rawajlandırıw, aymaqtıń mádeniy hám tábiyǵıy potencialınan nátiyjeli paydalanıw, sırt elli turistlerdiń aǵımın arttırıw baǵdarındaǵı áhmiyetli wazıypalar kórip shıǵıldı.
Sapar etiw juwmaǵında investiciyalıq jumıstı bunnan bılay da xoshametlew, eksportqa qolaylı ónimler islep shıǵarıw kólemin arttırıw jáne xalıqtıń bántligi hám turmıs dárejesin jaqsılaw boyınsha anıq usınıslar islep shıǵıldı, – dep málimleme beredi senat.uz saytı.

Qaraqalpaqstan xabar agentligi