Ózbekstan Respublikası Prezidentiniń baslaması menen Buxara wálayatı Xojeli rayonına biriktirilip, sońǵı jıllar dawamında bir qansha nátiyjeli jumıslar ámelge asırıldı.

Usınday iygilikli islerdiń biri sıpatında, Xojeli rayonı oraylıq stadionınıń rekonstrukciya jumısların aytıp ótsek boladı. Atap aytqanda, stadionǵa Buxara wálayatı tárepinen jámi 5 mlrd. sum qarjı ajıratılıp, keń kólemdegi qurılıs-ońlaw jumısları ámelge asırıldı. Nátiyjede 2 mıńnan aslam tamashagóy sıyımlılıǵına iye bolǵan zamanagóy kórinistegi xalıqaralıq talaplarǵa juwap beretuǵın úlken stadion qurılıp pitkerildi. Sonday-aq, stadion óz náwbetinde jaslarımızdıń salamat turmıs tárizin qollap-quwatlawǵa, olardıń bos waqtın mazmunlı ótkeriwge júdá keń imkaniyatlar hám sport ıqlasbentleri ushında qolaylı sharayatlar jaratıp berdi.
1-noyabr kúni usı zamanagóy kórinistegi Xojeli rayonlıq oraylıq stadionınıń saltanatlı ashılıw máresimi bolıp ótti. Ilajǵa rayon hákimi J.Ermashev, Qaraqalpaqstan Respublikası sport ministri E.Qutıbaev, Buxara wálayatı hákiminiń orınbasarı J.Arashov, keń jámiyetshilik wákilleri, nuranıylar hám jaslar qatnastı.
Onda sózge shıqqanlar bul iygilikli baslamalar ushın húrmetli Prezidentimizge sheksiz minnetdarshılıq bildirip, keleshekte bul orın xalqımızdıń eń kuwanıshlı kúnlerinde xızmet etiwine isenim bildirdi. Bunnan soń jańa stadionda rayondaǵı aymaq komandaları arasında ótkerilgen «Xojeli rayonı hákiminiń kubogi» jarısınıń final oyınlarına start berildi.
Onda kuboktiń dáslepki basqıshlarında jeńiske erisken eń kúshli komandalar óz-ara bellesip, jarıs juwmaǵında birinshi orındı «Mustaqillik» komandası jeńip aldı hám kubok iyesine aylandı.
Sıylı ekinshi hám úshinshi orınlar «Baǵman» hám «Qırqınshı» mákan puqaralar jıyınları komandalarına nesip etti. Jeńimpazlar Xojeli hám Buxara hákimligi tárepinen tayarlanǵan arnawlı kubok, medal hám estelik sawǵalar menen sıylıqlandı. Ilaj rayonlıq mádeniyat bólimi xızmetkerleriniń koncert baǵdarlaması menen oǵada kewilli dawam etti.

Adilbay Orazov,
Qaraqalpaqstan xabar agentligi sholıwshısı