Xojeli rayonındaǵı “Qumjıqqın Xojeli Agro” fermer xojalıǵında Xojeli, Taqıyatas, Shomanay, Qanlıkól, Qońırat hám Moynaq rayonlarınıń basshıları, awıl xojalıǵı kárxanaları belsendileriniń qatnasıwında jer maydanlarınan nátiyjeli paydalanıw, sonday-aq gúzgi shúdigarlaw jumıslarına baǵıshlanǵan keńeytilgen kórgizbeli seminar ótkerildi.

Oǵan Qaraqalpaqstan Respublikası Ministrler Keńesiniń Baslıǵı F.Ermanov, Joqarǵı Keńes komitet baslıǵı A.Jumanazarov, Ministrler Keńesi baslıǵınıń orınbasarı Sh.Teshaev, rayon hákimleri, tiyisli taraw basshıları hám fermerler qatnastı.
Seminar dawamında, klasterler menen fermer xojalıqlarına tiyisli egislik jer maydanlarınıń konturların keńeytiw, shellerdi alıp taslaw, lazerli úskeneler járdeminde tegislew, atız shetlerine egiw, gúzgi shúdigarlaw jumısların sapalı alıp barıw boyınsha bir qatar kórsetpeler berilip, ámelge asırılıwı lazım bolǵan wazıypalar belgilep alındı. Sonday-aq, gúzgi shúdigarlaw mapazın joqarı dárejede shólkemlestiriw ushın texnikalar menen agregatlardıń tayarlıǵı boyınsha máseleler de qarap shıǵıldı.
Ilajda mexanizatorlardı hár tárepleme qollap-quwatlaw maqsetinde olarǵa azıq-awqatlar ónimler tarqatıldı.
Bunnan soń, qatnasıwshılar tárepinen “Jasıl mákan” ulıwma milliy joybarı sheńberinde atız shetlerine miyweli náller egildi.

Qaraqalpaqstan xabar agentligi