Ózbekstan Kórkem óner akademiyası Qaraqalpaqstan bóliminiń kórgizbeler sarayında “Natura” temasındaǵı kórgizbeniń ashılıw máresimi bolıp ótti.

“Qorshaǵan ortalıqtı qorǵaw hám “jasıl” ekonomika jılı” sheńberinde shólkemlestirilgen bul kórgizbeden 12 jergilikli xudojniktiń tábiyat gózzallıǵı hám ana watanǵa bolǵan súyispenshilikti sáwlelendirgen 90 nan aslam kartinası orın alǵan. Olardıń arasında ustaz xudojnikler menen bir qatarda jas talant iyeleri de bar.
Kórgizbeni ótkeriwden tiykarǵı maqset qaraqalpaq súwretlew ónerinde tábiyat hám insan, milliy dástúr hám zamanagóy kózqarastıń únlesligin kórsetiw bolıp tabıladı. Bul joybar arqalı jergilikli xudojnikler dóretiwshilik baylanıslardı bekkemlep, tamashagóylerge ana jurtımız tábiyatın jańasha estetikalıq jaqtan tanıstırıwdı názerde tutadı.
Kórgizbede Ózbekstan Kórkem óner akademiyasınıń haqıyqıy aǵzası, Ózbekstan hám Qaraqalpaqstan xalıq xudojnigi, “Shuhrat” medalınıń iyesi Sársenbay Baybosınov, Ózbekstan Kórkem óner dóretiwshileri awqamınıń aǵzaları Ájiniyaz Xudaybergenov, Timur Sulaymanov, Berdaq Babashev, Jetker Aybatov, Polatjan Abdireymov, sonday-aq, Najmiddin Shukurullaev, Salamat Bekbauliev, Timur Asqarov, Rafatdin Ibrayımov, Jamol Twrajanov, Anvar Seytniyazov sıyaqlı talantlı xudojniklerdiń eń saylandı shıǵarmaları tamashagóyler itibarına usınılmaqta.
Olardıń hár bir kartinası tuwılǵan eldiń tábiyǵıy reńin, gúzdiń jıllı demin, insannıń ishki dúnyası menen únles bolǵan kórkem tásirleniwdi sáwlelendiredi. “Gúzgi reńler,” “Qaraqalpaq qızı,” “Ámiwdáryada tań,” “Qosıq,” “Musa Jaliy awılında gúz” sıyaqlı shıǵarmalar kórgizbeniń tiykarǵı kórkem ózegin quraydı.
Kórgizbe eki hápte dawam etedi.

ÓzA