Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shomanay rayonında xalıqtıń turmıs jaǵdayın jaqsılaw baǵdarında ámelge asırılıp atırǵan jumıslar menen tanıstı.

Eń dáslep respublikamız Basshısı Begjap APJ aymaǵındaǵı jańadan qurılıp atırǵan «Omad Suld» duzdı qayta islew kárxanasınıń qurılıs jumısları menen tanısıp, jańa kárxana iske túsiriw ushın barlıq múmkinshiliklerdi iske salıw boyınsha juwapkerlerge tiyisli tapsırmalar berdi hám anıq wazıypalar belgilendi.
Bunnan soń Mádeniyat MPJ aymaǵındaǵı Drayver 24/7 joybarı tiykarında islenip atırǵan jaslar parkiniń qurılıs jumısları menen jaqınnan tanıstı. Bul jerde jaslar ushın mádeniy dem alıw hám sawda orınları, bayram ilajları hám koncert baǵdarlamaların ótkeriw ushın ashıq aspan astındaǵı arnawlı maydansha shólkemlestirilmekte.
Sonday-aq, húrmetli Prezidentimizdiń 2023-jıl 25-dekabr kúngi «2024-2026-jıllarda Ózbekstan Respublikasınıń social hám islep shıǵarıw infrastrukturasın rawajlandırıw is-ilajları haqqında»ǵı 404-sanlı qararı menen 9,4 mlrd. sum qarjı tiykarında, jańadan qurılǵan rayonlıq medicina bólimine qaraslı kóp tarmaqlı poliklinikada jaratılǵan sharayatlar, sonıń menen bir qatarda ishki jap-salmalardı betonlaw jumısları kózden ótkerildi.
Rayon orayında shólkemlestirilgen ónermentler sawda ornı jumısları menen tanıstı. Obektler menen tanısıw barısında respublikamız basshısı isbilermenlerdiń óz jumısın rawajlandırıwı ushın jaqınnan járdem beriw, olardıń mashqalalarına sheshim tabıw boyınsha juwapkerlerge anıq tapsırmalar berdi.
Sonday-aq, rayondaǵı bar bolǵan mashqalalardı belgilep alıw maqsetinde, kóshe biyleri menen ushırasıw ótkerilip, awıl-aymaqlarda óz sheshimin kútip turǵan máseleler boyınsha pikirlesti.
Bunnan soń Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında rayondı sociallıq-ekonomikalıq jaqtan rawajlandırıw, kámbaǵallıqtı qısqartıw, xalıqtıń bántligin támiyinlew hám investiciyalıq joybarlardı ámelge asırıw baǵdarındaǵı berilgen tapsırmalar boyınsha is-ilajlar baǵdarlamasınıń orınlanıwı máselelerine arnalǵan májilis ótkerildi.

Qaraqalpaqstan xabar agentligi