Al-Fashir qalasındaǵı bas emlewxanada júzlegen tınısh xalıq óltirildi. Jáhán densawlıqtı saqlaw shólkemi (WHO) basshısı Tedros Adanom Gebreesustiń málim etiwinshe, “Rapid Support Forces” (RSF) jawıngerleri “Saudi Hospital” ishinde 460 adamdı óltirdi. Emlewxanada jatırǵan nawqaslar, olardıń jaqınları hám medicina xızmetkerleri atıp taslanǵan, dep xabar berdi Sudan shıpakerler tarmaǵı.

RSF jawıngerleri 18 aylıq qamaw hám tınımsız bombalawdan keyin qolǵa kirgizgen bul qala Darfur armiyası qadaǵalawındaǵı sońǵı iri mánzil edi. Qalanıń qoldan ketiwi sebepli 250 mıńnan aslam biygúna xalıq wákiliniń táǵdiri qáwip astında qalǵan. Puqaralar qaladan shıǵıwǵa urınǵanda, qıynaw, tayaq hám zorlıqqa ushıramaqta, urlap ketilmekte, tutqınǵa alınıp, úlken muǵdardaǵı tólem talap etilmekte. Ayırımları jolda-aq atıp óltirilgen.
Baylanıs úzilgenligi sebepli jaǵdaydı tastıyıqlaw qıyın. Videokórinislerde RSF jawıngerleri quralsız adamlardı atıp atırǵanın kóriw múmkin. “Bul jer házirgi waqıtta jer júzindegi eń jaman qayǵılı orın”, – dedi BMShtıń burınǵı xızmetkeri Yan Egeland. WHO maǵlıwmatına bola, urıs baslanǵanınan berli Sudan boylap 185 medicina mákemesine hújim belgilengen.
BMSh, gumanitar shólkemler hám huqıq qorǵawshılar jaǵdayǵa jedel xalıqaralıq itibar hám aralasıw zárúrligin talap etpekte. RSF házir Darfur hám qońsılas Kordofannıń úlken bólegin qadaǵalamaqta. Húkimet armiyası bolsa paytaxt Xartum hám shıǵıs aymaqlarda qalǵan. 2021-jıl eki tárep bir waqıtta hákimiyattı iyelegeni sebepli házirgi waqıtta mámleket bólshekleniw aldında. Sudan házir eń qara kúnlerdi basınan ótkermekte.

Muslim Ziyo, ÓzA