Qubla Koreya Prezidenti Li CHje Myon menen sóylesiw waqtında AQSh Prezidenti Donald Tramp Koreya yarım atawındaǵı mashqalanı sheshiw ushın Arqa Koreya menen birge islesetuǵının ayttı.

Onıń atap ótiwinshe, bul biraz waqıt talap etedi, “biraq aqır-ayaǵında hámmesi sheshiledi”.
Tramptıń sózlerine bola, bul ret Amerika tárepi Arqa Koreya jetekshisi Kim CHen In menen ushırasıw kestesi boyınsha kelise almadı. Sonıń menen birge Amerika jetekshisi KXDR basshısı menen arasında “júdá jaqsı qatnasıq” bar ekenin, olar “jaqsı kelisip atırǵanın” da atap ótken.
Rossiya-Ukraina urısı haqqında da sóz etken Tramp kelispewshilikti toqtatıw niyetin jáne bir márte tastıyıqlaǵan: Biz 8 kelispewshilikti sheshtik. Sheshilmegen birden-bir mashqala – Rossiya hám Ukraina. Prezident Putin menen jıllı múnásibetim sebepli men bunı ańsat is, dep oylaǵan edim. Málim bolıwınsha, másele onsha ápiwayı emes eken. Bul mashqalanı da álbette saplastıramız.

S.Rahimov, ÓzA