Hár bir millettiń eń úlken baylıǵı – onıń tili. Til – millettiń ruwxın, tariyxın, mádeniyatın hám qádiriyatların áwladtan-áwladqa jetkeriwshi muqaddes qural bolıp esaplanadı.

Sonlıqtan 1989-jıl 1-dekabr sánesi qaraqalpaq xalqı ushın umıtılmas tariyxıy kún sıpatında qádirlenedi. Sebebi, áyne usı kúnde qaraqalpaq tiline mámleketlik til biyligi berildi. Bıyıl mine usı ullı waqıyaǵa 36 jıl tolmaqta.
Búgin biz, jas áwlad, bul sáne arqalı óz milliy qádiriyatlarımızǵa, ana tilimizge bolǵan muhabbat hám húrmetti jáne bir márte júregimizde sezemiz. Qaraqalpaq tili – biziń millet sıpatındaǵı ózligimizdi belgileytuǵın, birligimiz hám maqtanıshımızdı bildiretuǵın tımsal bolıp esaplanadı.
Házirgi kúnde mámleketimizde tildi rawajlandırıw, onıń abırayın arttırıw boyınsha úlken jumıslar ámelge asırılmaqta. Bilimlendiriw orınlarında qaraqalpaq tili hám ádebiyatı tereń oqıtılmaqta. Jaslar arasında ana tilinde dóretiwshilik, ilimiy jumıs alıp barıw, mádeniy ilajlarda belsene qatnasıw dástúrge aylanıp barmaqta. Bul bolsa tildiń tek ǵana saqlanıp qalıwı emes, al, jańa basqıshta rawajlanıwınan dárek beredi.
Men, bir student sıpatında, qaraqalpaq tilinde erkin sóylew hám jazıw imkaniyatına iye ekenligimnen maqtanaman. Ana tilim arqalı men óz tariyxımdı, xalqımnıń bay mádeniyatın, ádebiyatın hám dástúrlerin ańlayman. Biz jaslar bul tildi tek ǵana súyiwimiz emes, al onı qásterlep saqlaw, keleshek áwladlarǵa sap hám bay túrde jetkeriw ushın juwapker ekenimizdi de umıtpawımız kerek.
Qaraqalpaq tili – bul tek ǵana baylanıs quralı emes, al millettiń qálbi hám ruwxı. Onıń hár bir sózinde tariyx, mádeniyat hám milliy maqtanısh jasaydı.

Dilafruz Qalbaeva,
Berdaq atındaǵı QMU universiteti yuridika fakultetiniń siyasattanıw qánigeligi 2-kurs studenti.