Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında 11-noyabr – Kásiplik awqamları kúni múnásibeti menen ruwxıy-aǵartıwshılıq ushırasıw bolıp ótti.

Ilajda Ózbekstan Kásiplik awqamları Federaciyası baslıǵınıń orınbasarı, Miynet inspekciyasınıń baslıǵı Q.Qirgizaliev, Ózbekstan Kásiplik awqamları Federaciyasınıń Qaraqalpaqstan keńesiniń baslıǵı, Joqarǵı Keńes deputatı U.Jalmenov hám basqalar shıǵıp sóylep, kásiplik awqamları sistemasınıń mámleketimizdegi sociallıq-ekonomikalıq reformalardaǵı ornı, xızmetkerlerdiń máplerin qorǵaw hám miynet mádeniyatın arttırıwdaǵı áhmiyetin atap ótti.
Ushırasıw dawamında Qaraqalpaqstan Respublikası boyınsha joqarı oqıw orınları arasında filialdıń 3-kurs studenti P.Jumanova “Kásiplik awqamı stipendiyası” jeńimpazı sıpatında atap ótildi. Student qızǵa sertifikat saltanatlı túrde tapsırıldı.
Bul stipendiya respublikada belgilengen eń kem miynet haqınıń eki esesinde belgilenip, 2026-jıldıń yanvar ayınan baslap altı ay dawamında hár ayda tólep barıladı.
– Bul men ushın úlken maqtanısh hám juwapkershilik. Bul itibar meni jáne de bilimge qushtar, belsendi hám jámáátke payda keltiretuǵın qánige bolıw ushın kúsh baǵıshlaydı. Kásiplik awqamları jaslardı qollap-quwatlawda áhmiyetli orın iyelemekte, biz bolsa bul isenimdi ámeliy nátiyjeler menen aqlawǵa háreket etemen,-deydi P.Jumanova.
Filialdaǵı bul ushırasıw jaslardıń sanasında miynetke húrmet, jámáátlik juwapkershilik hám pidáyilıq sezimlerin jáne de bekkemlewge xızmet etedi.

Qaraqalpaqstan xabar agentligi