Berdaq atındaǵı Qaraqalpaq mámleketlik akademiyalıq muzıkalı teatrında ataqlı dramaturg S.Xojaniyazovtıń “Súymegenge súykenbe” atlı muzıkalı komediyası qoyıldı.

Bul spektakl insan sezimleriniń ráńbáreń jilwası, muhabbat hám adasıw, keshirim hám haq kewillilik haqqında jırlanǵan turmıslıq saxna shıǵarması bolıp, ol tamashagóydi bir waqıttıń ózinde hám kúldirip, hám oylandırıp qoydı. Qaharmanlar táǵdiri arqalı hár bir adam ózin tapqanday boldı, al saxna waqıyaları tamashagóy kewline jıllılıq alıp kirdi.
Spektakldi Ózbekstan xalıq artisti, Berdaq atındaǵı mámleketlik sıylıqtıń laureatı N.Ańsatbaev saxnalastırǵan.
Spektakl sońında rejissyor N.Ańsatbaev hám teatr direktorı P.Mamutovlar shıǵıp sóylep, kórkem óner sheberlerine shın júrekten minnetdarshılıq bildirdi. Bunnan tısqarı, aktyorlardıń pidákerlik miyneti, saxnaǵa alıp shıqqan obrazlardaǵı janlı sezimler hám tamashagóyge inam etken jıllı sezimler ushın tereń minnetdarshılıq bildirip, olardıń dóretiwshilik párwazı jáne de joqarı shıńlarǵa kóteriliwin tiledi.
– Bul spektakl usı kúnge shekem 500 márteden aslam saxnaǵa qoyılǵan. Spektakl juwmaǵında zalda qol shapalaqlar uzaq waqıtqa shekem dawam etti. Tamashagóyler aktyorlardıń sheberligine hayran qalıp, olardı alǵıslarǵa bóledi. Hár bir shıǵıwdan keyin saxnaǵa uzatılǵan gúllerdiń sanına jetip bolmaytuǵın edi – aktyorlardıń qolları gúllerge tolıp, olardıń júzinde shın júrekten quwanısh, qálbinde bolsa tamashagóydiń mehir-muhabbatınıń jıllılıǵı sáwlelendi, – deydi teatr direktorı P.Mamutov.
Bir sóz benen aytqanda, “Súymegenge súykenbe” – júreklerge quwanısh, júzlerge kúlki, kewillerge bolsa jıllılıq alıp kirgen muzıkalı komediya boldı.

Á.Jiyemuratov,
Qaraqalpaqstan xabar agentligi