Puqaralardıń huqıq hám erkinliklerin qorǵaw – hár qanday demokratiyalıq mámlekettiń tiykarǵı qádiriyatı.

Konstituciya hám nızamlarda bekkemlep qoyılǵan huqıqlardı ámelde támiyinlewde sud hám notariat sistemaları áhmiyetli orın iyeleydi. Olar puqaralardıń nızamlı máplerin qorǵaw, ádillikti ornatıw hám huqıqıy mádeniyattı arttırıwda bir-birin tolıqtıratuǵın áhmiyetli sistema bolıp esaplanadı.
Ózbekstan Respublikası Joqarǵı sudı hám Ózbekstan Notarial palatası arasında 2025-jıl 4-sentyabr kúni qol qoyılǵan birge islesiw haqqındaǵı Kelisim bul baǵdardaǵı birge islesiwdi jańa basqıshqa alıp shıqtı.
Hújjettiń tiykarǵı maqseti – sud hám notariuslar arasındaǵı óz-ara baylanıslardı bekkemlew, ámeliyatta ushırasıp atırǵan mashqalalardı tallaw hám nızamshılıqtı jetilistiriw boyınsha birgeliktegi usınıslar islep shıǵıwdan ibarat.
Usı Kelisimniń orınlanıwın támiyinlew sheńberinde Qaraqalpaqstan Respublikası sudında “Puqaralardıń huqıqları menen nızamlı máplerin nátiyjeli qorǵawdı támiyinlewde sud hám notariattıń birge islesiwi” atamasında dógerek sáwbeti bolıp ótti. Oǵan Qaraqalpaqstan Respublikası sudı baslıǵınıń orınbasarı A.Kerimbaev, Notarial palatasınıń Qaraqalpaqstan Respublikası aymaqlıq basqarmasınıń baslıǵı Z.Yaxipov, puqaralıq isleri boyınsha sudyalar hám jeke menshik ámeliyattaǵı notariuslar qatnastı.
Ilajda sud hám notariat sistemalarınıń óz-ara birge islesiwi puqaralardıń huqıqların nátiyjeli qorǵawda qanday orın iyelep atırǵanı haqqında pikir alısıldı. Sonday-aq, Konstituciyada belgilengen erkinlik, teńlik hám keńpeyillik principleri, múlk huqıqınıń qol qatılmaslıǵı, miyras huqıqın rásmiylestiriw, turaq jaydan paydalanıw huqıqları sıyaqlı máselelerde ámeliy mısallar tiykarında dodalawlar alıp barıldı.
Anıq usınıs sıpatında notarial processlerdi sanlastırıw, puqaralar ushın elektron xızmetler sheńberin keńeytiw hám sud-notarius birge islesiwin birden-bir málimleme sisteması tiykarında shólkemlestiriw máseleleri alǵa qoyıldı.
Ushırasıw juwmaǵında qatnasıwshılar arasında qızǵın soraw-juwaplar bolıp ótti. Dodalawlar dawamında sud-huqıq tarawında ámelge asırılıp atırǵan reformalar puqaralardıń mámleketlik uyımlarǵa bolǵan isenimin bekkemlep atırǵanı atap ótildi.
Ilaj sońında keleshekte bunday sóylesiw hám birge islesiw maydanların turaqlı shólkemlestiriw, nızamshılıq hám ámeliy jumıs tájiriybesindegi mashqalalardı birgelikte sheshiw boyınsha usınıslar berildi.

ÓzA