Ózbekstan Respublikası Ministrler Kabineti “Ózbekstan ekonomikası ushın sistemalı áhmiyetke iye iri kárxanalar tárepinen bank krediti hám sırtqı qarızlardı qaplaw sistemasın bunnan bılay da jetilistiriw haqqında” qarar qabıl etti.

Oǵan muwapıq, Iri kárxanalar menen baylanıslı qáwip-qáterlerdi basqarıw boyınsha muwapıqlastırıwshı komissiya dúziledi.
Tómendegiler Muwapıqlastırıw komissiyasınıń tiykarǵı wazıypaları hám jumıs baǵdarları etip belgilendi:
ayrıqsha monitoringti talap etiwshi sistemalı áhmiyetke iye iri kárxanalar dizimin tastıyıqlaw;
iri qarızdarlar tárepinen tartılıp atırǵan bank krediti yamasa sırtqı qarız esabınan qarjılandırılıwı usınıs etilip atırǵan joybar boyınsha usınıslardı kórip shıǵıw;
bank krediti yamasa sırtqı qarızlardı tartıwdı maqullaw yamasa biykarlaw boyınsha qararlar qabıl etiw hám usı qarjılar esabınan qarjılandırılǵan joybarlardıń nátiyjeliligin úyreniw;
iri qarızdarlardıń finanslıq jaǵdayın turaqlı monitoring etiw hámde finanslıq jaǵdayı jamanlasqanda olardı finanslıq salamatlandırıw boyınsha usınıslar islep shıǵıw.
Qarar menen:
Iri qarızdarlar menen baylanıslı risklerdi basqarıw boyınsha muwapıqlastırıwshı komissiya quramı;
Ózbekstan ekonomikası ushın sistemalı áhmiyetke iye iri kárxanalar tárepinen bank krediti hám sırtqı qarızlardı tartıw tártibi haqqındaǵı reje tastıyıqlandı.
2026-jıl 1-yanvardan baslap iri qarızdarlar tárepinen bank krediti hám sırtqı qarızlardı tartıw, olardan paydalanıw hám olardıń muǵdarın optimallastırıwdı monitoring etiwdiń tómendegi mexanizmleri engiziledi:
iri qarızdarlardı olardıń finanslıq jaǵdayına bola “tómen qáwipli,” “ortasha qáwipli” hám “joqarı qáwipli” toparlarǵa ajıratıw hám usı kategoriyalardan kelip shıqqan halda, olarǵa bank krediti hám sırtqı qarız ajıratıw tártibin belgilew;
Muwapıqlastırıw komissiyası tárepinen bank krediti hám sırtqı qarızlar boyınsha iri qarızdarlar minnetlemeleriniń orınlanıwı boyınsha dáwirlik monitoringti ámelge asırıw;
iri qarızdarlardıń jıl juwmaǵı boyınsha finans-xojalıq jumısın xalıqaralıq auditorlıq tarmaqlarına hám xalıqaralıq associaciyalarǵa aǵza bolǵan auditorlıq shólkemler tárepinen auditorlıq tekseriwden ótkeriw, usı qarar qabıl etilgen sáneden aldın tańlap alınǵan auditorlıq shólkemler buǵan kirmeydi;
nızamshılıq hújjetlerinde belgilengen jaǵdaylarda, iri qarızdarlardıń finanslıq qarızları esabınan qarjılandırılatuǵın joybarlardıń texnikalıq-ekonomikalıq tiykarların hám basqa da hújjetlerin wákillikli uyımlarda ekspertizadan ótkeriwde Muwapıqlastırıw komissiyasınıń finanslıq qarızdı tartıw boyınsha unamlı juwmaǵı yamasa onıń xabardar etilgenligin tastıyıqlawshı hújjetler usınılǵannan keyin ámelge asırıw;
iri qarızdarlardıń bank krediti hám sırtqı qarızları esabınan qarjılandırılatuǵın joybarlar, sırtqı qarız kelisimleri hám kredit shártnamaları boyınsha minnetlemeleriniń orınlanıwı menen baylanıslı bolǵan maǵlıwmatlardı hár sherektiń juwmaǵı menen Muwapıqlastırıw komissiyasınıń jumısshı uyımına usınıw;
Muwapıqlastırıw komissiyasınıń tiyisli jumısshı uyımı tárepinen iri qarızdarlardıń ámeldegi sırtqı qarız kelisimleri hám kredit shártnamalarınıń finanslıq shártlerine (kovenantlarına) ámel etiliwin monitoring etiw;
iri qarızdarlardıń finanslıq jaǵdayı jamanlasıp, olar tárepinen tartılǵan finanslıq qarızlar boyınsha kelisimler shártleri zárúr dárejede orınlanbaǵan jaǵdayda, Muwapıqlastırıw komissiyasınıń qarızdarlarǵa baylanıslı usı qarar menen belgilengen wákillik sheńberinde tiyisli ilajlardı názerde tutatuǵın qarardı qabıl etiwi;
Muwapıqlastırıwshı komissiya tastıyıqlaǵan ayrıqsha monitoringti talap etiwshi sistemalı áhmiyetke iye iri qarızdarlar dizimine kirgizilgen iri qarızdarlar tárepinen hár shereklik finanslıq esabatlardı usınıw talabın ornatıw;
juwapkershiligi sheklengen jámiyetler túrindegi iri qarızdarlar tárepinen bank kreditleri hám sırtqı qarızlardı tartıwǵa olardıń shólkemlestiriw-huqıqıy formasın akcionerlik jámiyetlerine ózgertken hám jumısın akcionerlik jámiyetleri haqqındaǵı nızam hújjetlerine muwapıq shólkemlestirgen jaǵdaylarda ruqsat beriw.

ÓzA