Seul qalasında Koreya Respublikası Milliy policiya agentligi tárepinen besinshi Xalıqaralıq policiya sammiti shólkemlestirildi. Policiya uyımları arasında dástúriy tárizde shólkemlestirilip kiyatırǵan eń iri ilajlardan biri bolǵan bul sammitte 30 dan aslam shet mámleketlerdiń 90 nan aslam wákili qatnastı.

Sammitte Ózbekstan Respublikası Ishki isler ministri Aziz Toshpolatov basshılıǵındaǵı delegaciya da qatnastı.
Sammit qatnasıwshıları dúnyada júz berip atırǵan qáweterli processlerde policiyaǵa baylanıslı keleshektegi baǵdarlardı belgilew, sanlı transformaciya dáwirinde keleshektegi policiya jumısındaǵı mashqalalardı anıqlawǵa itibar qarattı.
Sonıń menen birge, innovaciyalıq siyasat hám kózqaraslardı dodalaw, dúnya policiya jámiyetshiligi menen óz-ara eki hám kóp tárepleme qatnasıqlardı rawajlandırıw jáne keleshekte jámiyet ushın sáykes keletuǵın policiya strategiyasın jaratıw ushın integraciyalasqan ideyalardı islep shıǵıw haqqında sóz boldı.
Sammit sheńberinde Ishki isler ministri Aziz Toshpolatov Milliy policiya agentligi Bas komissarı wazıypasın atqarıwshı Yu Je Song penen sóylesiw ótkerdi.
Sóylesiw dawamında Ózbekstan Ishki isler ministrligi hám Koreya Milliy policiya agentligi arasındaǵı baylanıslardıń huqıqıy tiykarların bekkemlew, transmilliy jınayatshılıqqa qarsı gúresiw, jámiyetlik tártipti hám qáwipsizlikti támiyinlew, sonday-aq, óz-ara tájiriybe almasıw hám kadrlar tayarlaw sıyaqlı eki tárepleme birge islesiwdi rawajlandırıw perspektivalarına baylanıslı máseleler dodalandı.
Doslıq hám konstruktivlik ruwxta ótken sammit sheńberinde mámleketimiz delegaciyası Koreya hám basqa da birge islesiwshi mámleketlerdiń policiya uyımları menen baylanıslardı bekkemlew baǵdarında tiyisli wazıypalardı belgilep aldı.

Ilaj sheńberinde shólkemlestirilgen Koreya Respublikası Milliy policiya agentligi dúzilgeniniń 80 jıllıǵına baǵıshlanǵan saltanatlı ilaj, «Korea Police world Expo-2025» kórgizbesine de barıldı. Kórgizbe sheńberinde kiberjınayatshılıqqa qarsı gúresiw bólimleriniń jumısı, zamanagóy málimleme texnologiyaları hám policiya tarawında engizilgen aldınǵı innovaciyalar menen jaqınnan tanıstı.
Sapar etiw dawamında delegaciya aǵzaları Koreya Milliy policiya universitetiniń jumısın úyrendi. Kadrlar tayarlaw, oqıtıw hám mamanlıq arttırıw sisteması, tarawǵa baylanıslı aldınǵı tájiriybeler haqqında pikir alısıldı.

Koreya policiyasınıń tájiriybesin úyreniw maqsetinde mámleketimiz delegaciyası Seul qalalıq policiya agentligi Aviciya bóliminiń jumısı menen tanıstı. Bul bólimshe jámiyetlik tártipti saqlaw, qáwipsizlikti támiyinlew hám ayrıqsha jaǵdaylarda dronlar, policiya vertolyotları hám basqa da aviaciya quralların qollanıw menen shuǵıllanadı.
Bul ilajlar jáhán policiya shólkemleri arasında tájiriybe almasıw, innovaciyalıq kózqaraslardı úyreniw hám qáwipsizlik tarawındaǵı birge islesiwdi rawajlandırıwda úlken áhmiyetke iye.

N.Abduraimova, ÓzA