Ózbekstan hám Awǵanstan arasında sawda-ekonomikalıq qatnasıqlardı keńeytiw, jeke menshik sektor baylanısların bekkemlew hám iri investiciyalıq joybarlardı ámelge asırıw boyınsha anıq, izbe-iz jumıs alıp barılmaqta.

Usı maqsette mámleketimiz Sawda-sanaat palatası hám “Awǵan tekstil korporaciyası” mámleketlik kárxanası arasında elimizde jumısı toqtap qalǵan ayırım toqımashılıq kárxanaların Awǵanstan aymaǵında lokalizaciyalaw haqqında birge islesiw memorandumına qol qoyıldı. Bul hújjet tiykarında dáslepki inventarizaciyalaw hám joybarlaw jumısları názerde tutılǵan.
Belgilengen wazıypalardı orınlaw maqsetinde 18-23-oktyabr kúnleri Ózbekstan Sawda-sanaat palatasınıń xızmetkeri Z.Normatov hám tarawdıń maman qánigelerinen ibarat delegaciyanıń Awǵanstanǵa xızmet saparı shólkemlestirildi.
Sapar dawamında Parvon wálayatı Gúlbáhár rayonı hám Qandahárdegi tekstil fabrikaları, Qabul qalasındaǵı tigiwshilik cexı, Balx wálayatı Mozori-Sharif hám Puli-Xumri qalalarındaǵı toqımashılıq kárxanaları úyrenildi.
Imaratlardıń házirgi jaǵdayı, texnologiyalıq úskeneler hám infrastruktura imkaniyatı bahalanıp, dáslepki joybarlaw ushın zárúr texnikalıq-ekonomikalıq maǵlıwmat toplandı.
Házirgi waqıtta ekspertler bar maǵlıwmatlardı qayta islep, tallap atır. Bul process Awǵanstandaǵı kárxanalardı tiklew hám iske qosıw boyınsha anıq usınıslar islep shıǵıwǵa xızmet etedi.

M.Pirmatova, ÓzA